માધાપર ચોકડી પાસે બાલાજીની એજન્સીના ગાર્ડને છરી બતાવી લૂંટ કરનાર ચડ્ડી બનીયાનધારી ગેંગનો સાગરીત ઝડપાયો

Crime | Rajkot | 13 December, 2024 | 04:29 PM

ક્રાઈમ બ્રાંચની ટીમે ધાનપુરના શખ્સને એરપોર્ટ ફાટક પાસેથી દબોચી લીધો : અગાઉ ગેંગ સામે ગુજસીટોક પણ દાખલ થયેલ છે : પીએસઆઈ વી.ડી. ડોડીયા અને ટીમને કામગીરી

સાંજ સમાચાર

રાજકોટ તા.13
લૂંટ અને ચોરીના અનેક ગુનાને અંજામ આપનાર ચડ્ડી બનીયારધારી ગેંગના સાગરીતને ક્રાઈમ બ્રાંચની ટીમે એરપોર્ટ ફાટક પાસેથી દબોચી લઈ કાર્યવાહી કરી હતી. અગાઉ ગેંગ વિરૂધ્ધ ગુજસીટોક ગુનો પણ દાખલ થયેલ છે.

પ્રાપ્ત વિગત મુજબ માધાપર ચોકડી પાસે અમરેલીયા બાલાજી સેલ્સ એજન્સીમાં ગત વર્ષે તા.6-1-2023ના ત્યાં સીકયુરીટી ગાર્ડ મોડી રાત્રીના સુતા હતા ત્યારે અંદર ઘુસેલા ત્રણ અજાણ્યા શખ્સોએ તેમને છરી દેખાડી અંદર પ્રવેશી સીકયુરીટી ગાર્ડને છરી બતાવી અવાજ કરતો નહીં નહીંતર તને મારી નાખશું તેમ કહી ખાટલે બેસાડી દીધો હતો અને બાદમાં એજન્સીના ગોડાઉન અને ઓફીસમાં પ્રવેશ કરી ઓફીસના ટેબલમાં રહેલ વેપારના રૂા.1.95 લાખની ચોરી કરી નાસી છુટયા હતા.

તેમજ બી ડીવીઝન પોલીસ સ્ટેશન વિસ્તારમાં પણ છરીની અણીએ ચોરી કરી ચડ્ડી બનીયાન ધારી ગેંગ નાસી છુટી હતી. જે અંગે અલગ અલગ પોલીસ મથકમાં ગુના નોંધાયા હતા.

જે બાદ ક્રાઈમ બ્રાંચની ટીમ ચડી બનીયાન ગેંગના આરોપીને પકડવા તપાસમાં હતા ત્યારે પીએસઆઈ વી.ડી. ડોડીયા, હે.કો. દિપક ચૌહાણ, યુવરાજસિંહ ઝાલા અને કોન્સ. પ્રદીપસિંહ જાડેજાને મળેલ ચોકકસ બાતમીના આધારે ચડી બનીયાનધારી ગેંગના સુત્રધાર ગોરા વરસીંગ મોહનીયા (ઉ.25) (રહે. બીલીયા ગામ, ધાનપુર)ને દબોચી લઈ કાર્યવાહી કરી હતી.

ઉલ્લેખનીય છે કે, લુંટ અને ચોરીના ગુનામાં સંડોવાયેલ ચડી બનીયાનધારી ગેંગના શખ્સોને અગાઉ ક્રાઈમ બ્રાંચની ટીમે પકડી ગુજસીટોક ગુના હેઠળ ધકેલી દીધા છે.