BCCI કડક બન્યુ : IPL-2025માં નવા નિયમો આવ્યા : બોર્ડે મેદાન પર અમ્પાયરોને વિશેષ સત્તા આપી : અનેક ખેલાડીઓના બેટ ચેક કર્યા

મોટા કદના બેટ પર અમ્પાયરોની નજર : બેટ્સમેનોની તપાસ થશે

નવી દિલ્હી : આઈપીએલમાં ચોગ્ગા અને છગ્ગાનો વરસાદ થઈ રહ્યો છે, પરંતુ બીસીસીઆઈ એ વાત પર નજર રાખી રહ્યું છે કે કોઈ બેટ્સમેન સ્ટાન્ડર્ડ કરતા મોટા કદના બેટનો ઉપયોગ કરી રહ્યો છે કે કેમ. આ માટે બીસીસીઆઈએ આ સીઝનથી મેદાન પરના અમ્પાયરોને વિશેષ સત્તા આપી છે.

આ અંતર્ગત ઓન-ફીલ્ડ અમ્પાયર મેચની મધ્યમાં બેટ ગેજ વડે બેટ્સમેનના બેટનું કદ માપી શકે છે. રવિવારે જયપુર અને દિલ્હીમાં રમાયેલી IPL મેચો દરમિયાન અમ્પાયરોએ ફિલ સોલ્ટ, દેવદત્ત પેડિકલ, શિમરોન હેટમાયર અને હાર્દિક પંડ્યાના બેટની તપાસ કરી હતી.

IPLમાં આ નિયમ ક્યારે શરૂ થયો
બેટની સાઈઝને લઈને પહેલાથી જ નિયમો છે, પરંતુ આઈપીએલ-2025થી મેચો વચ્ચે મેદાન પર બેટનું ચેકિંગ શરૂ કરવામાં આવ્યું.

શા માટે પડી જરૂર: મેચ પહેલા અમ્પાયર ડ્રેસિંગ રૂમમાં તમામ બેટ્સમેનોના બેટની સાઈઝ માપે છે, પરંતુ એવી બાબતો સામે આવી છે કે કેટલાક બેટ્સમેન મોટી સાઈઝના બેટને છુપાવે છે. બીસીસીઆઈએ અમ્પાયરોને મેદાન પર જ બેટનું કદ માપવાનો અધિકાર આપ્યો હતો.
અમ્પાયર ક્યારે બેટને તપાસે છે: જ્યારે અમ્પાયર કોઈ બેટ્સમેનના બેટ અંગે શંકા હોય તો તેઓ તેને મેદાન પર જ બેટ ગેજથી માપે છે.

શું કોઈ બેટ્સમેને ફરિયાદ કરી છે?
BCCI ને ગત સિઝનમાં કેટલાક બેટ્સમેનો વિરુદ્ધ ફરિયાદો મળી હતી. તેમને ચેતવણી આપીને જવા દેવામાં આવ્યા હતા.
પકડાશે તો શું પગલાં લેવાશે? જો અમ્પાયરને કોઈ બેટ્સમેનનું બેટ નિર્ધારિત ધોરણ કરતા મોટું જણાય તો તેને બેટ બદલવા માટે કહેવામાં આવશે. હજુ સુધી દંડ અંગે કોઈ માહિતી નથી.

સ્ટાન્ડર્ડ કદ કરતા મોટા બેટ અયોગ્ય છે....
(1) નિયમ પ્રમાણે, બેટની પહોળાઈ 4.25 ઇંચ (10.79 સે.મી.) થી વધુ ન હોવી જોઈએ.
(2) બેટના વચ્ચેનો ભાગ (ઉપસેલો ભાગ) ની જાડાઈ 2.64 ઇંચ (6.7 સે.મી.) કરતા વધી શકતી નથી.
(3) બેટના નીચેનો ભાગની લંબાઇ 1.56 ઇંચ (4 સે.મી.)થી વધુ હોવી જોઇએ નહીં.
(4) બેટની લંબાઈ હેન્ડલની ટોચથી નીચે સુધી 38 ઇંચ (96.4 સે.મી.) કરતાં વધી શકતી નથી.

એકવાર આવું બન્યું... ડેનિસ લિલી એલ્યુમિનિયમથી બનેલું બેટ લઈને રમવા આવ્યો !!
આંતરરાષ્ટ્રીય ક્રિકેટમાં લાકડા સિવાયની કોઈપણ વસ્તુમાંથી બનેલા બેટનો ઉપયોગ કરવાની મંજૂરી નથી. ક્રિકેટના ઈતિહાસમાં એકવાર આનું ઉલ્લંઘન થયું હતું, જ્યારે ઓસ્ટ્રેલિયાના ડેનિસ લિલી પર્થમાં 1979ની એશિઝ શ્રેણી દરમિયાન ઈંગ્લેન્ડ સામે એલ્યુમિનિયમ બેટ લઈને ક્રીઝ પર આવ્યા હતા.

ઈંગ્લેન્ડના કેપ્ટન માઈક બ્રેયર્લીએ આ અંગે અમ્પાયરોને ફરિયાદ કરી હતી, પરંતુ લિલી આ બેટથી બેટિંગ કરવા પર અડગ હતી. અંતે, ઘણી મુશ્કેલી પછી, તે લાકડાના બેટથી રમવા માટે રાજી થયો.