સહકારી જમીન હડપવાનો કારસો : મહેસુલી અધિકારીઓની Fir કરવાની માંગ હાઈકોર્ટે ફગાવી

સહકારી જમીન હડપવાનો કારસો : મહેસુલી અધિકારીઓની FIR કરવાની માંગ હાઈકોર્ટે ફગાવી

Gujarat | Ahmedabad | 15 April, 2025 | 11:18 AM

અમરેલીનાં કેસમાં તત્કાલીન મામલતદાર - સર્કલ ઓફિસરને ઝટકો

સાંજ સમાચાર

અમદાવાદ,તા.15
બોગસ દસ્તાવેજોના આધારે સરકારી જમીન હડપવા રેવન્યુ રેકોર્ડમાં બનાવટી એન્ટ્રી કરવાના ચકચારભર્યા કેસમાં સરકારી મહેસુલી અધિકારીઓ સામેની એફઆઈઆર રદ કરવાની અરજી હાઈકોર્ટે ફગાવી દીધી હતી.

અમરેલી જીલ્લાના 2014 ના આ કેસમાં 2018 માં મામલતદારે બાબરા પોલીસ સ્ટેશનમાં સરકારી જમીન હડપવાની ફરીયાદ દાખલ કરી હતી. તપાસ દરમ્યાન તત્કાલીન સર્કલ ઈન્સ્પેકટર લાલજી ચાવડા તથા ઈ-ધરા પ્રોજેકટનાં મામલતદાર ઘનશ્યામ રોકડની સંડોવણી ખુલી હતી.

ગામનાં મહેસુલી રેકોર્ડમાં બચુ ભવાનનું નામ બોગસ દસ્તાવેજોમાં ઉમેરી દેવાયું હતું અને પછી સરકારી જમીનનાં માલીક તરીકે તેમનાં વારસદારોનાં નામોની એન્ટ્રી કરી દેવામાં આવી હતી.

મહેસુલ અધિકારીઓએ હાઈકોર્ટમાં એવી દલીલ કરી હતી કે, રેવન્યુ રેકર્ડમાં નામ ઉમેરા એન્ટ્રી માટે સહકારી પરિપત્રો તથા માર્ગદર્શક નિયમોનો જ અમલ કર્યો હતો. એટલે એફઆઈઆર રદ કરવામાં આવે.બચુ ભવાનનું નામ 2004 થી મહેસુલી રેકર્ડમાં મૌજુદ હતા અને તેમનાં સંતાનોનાં નામોની જ એન્ટ્રી તેઓએ પાડી હતી.

સહકારી વકીલ દ્વારા રેવન્યુ રેકર્ડમાં ચેડા કરીને સરકારી જમીન હડપવાનો આ ‘કલાસીક કેસ’ ગણાવીને અરજીનો વિરોધ કર્યો હતો. સરકાર તરફથી એવી દલીલ કરવામાં આવી હતી કે મહેસુલી અધિકારીઓએ કોમ્પ્યુટરાઈઝડ સીસ્ટમનો ગેરલાભ ઉઠાવ્યો હતો.

બનાવટી નામ નોંધ 7/12 ના આધારે મૃત વ્યકિતનું નામ ઘુસાડાયું હતું. 2004 માં એન્ટ્રી દર્શાવી હતી. વાસ્તવમાં 1990 માં તેમનુ અવસાન થઈ ગયુ હતું.

આ કેસમાં સુનાવણી બાદ જસ્ટીસ જે.સી.દોશીએ ચુકાદામાં એમ નોંધ્યુ હતું કે સરકારી જમીન હડપવા માટે સરકારી અધિકારીઓ સહિતની ટોળકીએ વ્યવસ્થિત ષડયંત્ર ઘડયુ હતું.