ખેલો ઇન્ડિયા પેરા ગેમ્સમાં ગુજરાતીનો ડંકો : ટેબલ ટેનિસમાં ગોલ્ડ મેડલ જીત્યો

ક્રિકેટર બનવા ઈચ્છતા રિશિતને 2017માં કબડ્ડી રમતી વખતે સ્પાઇનલ કોર્ડમાં ગંભીર ઈજા થઈ હતી

અમદાવાદ,  તા.14
દિલ્હીમાં તાજેતરમાં યોજાયેલી દિવ્યાંગો માટેની ખેલો ઇન્ડિયા પેરા ગેમ્સમાં વસઈમાં રહેતા 21 વર્ષના રિશિત નથવાણીએ ધુરંધર ખેલાડીઓને હરાવીને ટેબલ ટેનિસમાં ગોલ્ડ મેડલ મેળવ્યો છે.

ક્રિકેટર બનવા ઈચ્છતા રિશિતને 2017માં કબડ્ડી રમતી વખતે સ્પાઇનલ કોર્ડમાં ગંભીર ઈજા થવાથી તેના પગ કામ કરતા બંધ થઈ ગયા હતા. જોકે બાળપણથી જ સ્પોર્ટ્સમાં કરીઅર બનાવવા માગતા રિશિતે હિંમત નહોતી હારી.

2021માં તેણે વ્હીલચેર પર બેસીને ટેબલ ટેનિસ રમવાનું શરૂ કર્યું હતું. નેશનલ ચેમ્પિયનશપમાં રિશિત અગાઉ ત્રણ સિલ્વર મેડલ મેળવી ચુક્યો છે અને હવે તેણે ગોલ્ડ મેડલ પણ મેળવ્યો છે. રિશિતનો હવે પછીનો લક્ષ્યાંક નેશનલ લેવલની પેરા ઑલિમ્પિક્સમાં ભારત વતી રમવાનો છે.

રિશિત મમ્મી-પપ્પા અને નાના ભાઈ સાથે વસઈ-ઈસ્ટમાં આવેલી એવરશાઈન સિટીમાં રહે છે. રિશિતનાં મમ્મી વિધિ નથવાણીએ ‘મિડ-ડે’ને કહ્યું હતું કે ‘2017માં થયેલી ઈજાને લીધે રિશિતનું ખભાથી લઈને પગની પાની સુધીનું શરીર કામ કરતું બંધ થઈ ગયું હતું. રિશિત ક્રિકેટર બનવા માગતો હતો, પરંતુ તે પેરેલાઇઝ્ડ થઈ જતાં તેનું ક્રિકેટર બનવાનું સપનું તૂટી ગયું હતું.

જોકે રિશિત પહેલેથી સ્પોટ્સમેન બનવા માગતો હતો એટલે શરીર કામ ન કરતું હોવા છતાં તેણે હિંમત નહોતી હારી. બે વર્ષમાં રિશિતનું બોડી કમર સુધી કામ કરતું થઈ ગયું હતું, પરંતુ પગમાં શક્તિ નથી. તે વ્હીલચેર પર હરી-ફરી શકે છે.

રિશિત વ્હીલચેરમાં બેસીને પણ ક્રિકેટ રમતો હતો. પેરા ગેમ્સમાં ઑલિમ્પિક્સમાં ગોલ્ડ મેડલ મેળવનારાં ગુજરાતનાં ભાવના પટેલથી પ્રેરણા લઈને રિશિતે ટેબલ ટેનિસ રમવાની શરૂઆત 2021માં કરી હતી.

નાની-મોટી અનેક સ્પર્ધામાં રિશિતે મેડલ મેળ્યા બાદ વડોદરામાં આયોજિત નેશનલ ચેમ્પિયનશિપમાં રિશિતે ત્રણ સિલ્વર મેડલ મેળવ્યા હતા. પેરા ગેમ્સના ટેબલ ટેનિસના ભૂતપૂર્વ ચેમ્પિયન અશોક પાલે કોચિંગ આપવાની શરૂઆત કર્યા બાદ રિશિતની ગેમમાં ઘણો સુધારો થયો છે.

નેશનલ ચેમ્પિયનશિપ અને ખેલો ઇન્ડિયા પેરા ગેમ્સમાં શ્રેષ્ઠ પ્રદર્શન કર્યા બાદ રિશિતે હવે ઇન્ટરનેશનલ લેવલે રમીને પેરા ઓલિમ્પિક્સમાં ભારતને ગોલ્ડ મેડલ આપવાના પ્રયાસ શરૂ કરી દીધા છે. વર્લ્ડના ટોપ પ્લેયર્સમાં રેન્ક મેળવવા માટે ચાર સ્પર્ધામાં રમવું જરૂરી છે. અત્યાર સુધી બે ટુર્નામેન્ટ થઈ છે.

ઇન્ટરનેશનલ ટુર્નામેન્ટમાં રમવા માટે લાખો રૂપિયાનો ખર્ચ થાય છે. અમે સાધારણ પરિવારમાંથી આવીએ છીએ એટલે આર્થિક મુશ્કેલી થઈ રહી છે. ઉપરાંત વ્હીલચેર સાથે પ્રવાસ કરવામાં ઘણી તકલીફ થાય છે.’