કોઠારીયા સોલ્વન્ટ નજીક હિટ એન્ડ રન : અજાણ્યા વાહન હડફેટે શાપરના દિલીપભાઈ સોલંકીનું મોત

Crime | Rajkot | 15 April, 2025 | 05:20 PM

શાપર પોલીસે ગુનો નોંધવા તજવીજ કરી અજાણ્યા વાહન ચાલકની શોધખોળ હાથ ધરી

સાંજ સમાચાર

રાજકોટ, તા.15
કોઠારીયા સોલ્વન્ટ નજીક હિટ એન્ડ રનના બનાવમાં અજાણ્યા વાહન હડફેટે શાપરના દિલીપભાઈ સોલંકીનું મોત નીપજ્યું હતું. પોલીસ સૂત્રોએ જણાવ્યું કે, ગઈકાલે રાત્રે એક અજાણ્યા વ્યક્તિને રાજકોટ સિવિલ હોસ્પિટલમાં ઈજાગ્રસ્ત હાલતમાં 108 મારફતે ખસેડવામાં આવેલ. પોલીસને 108ના સ્ટાફ મારફતે જાણવા મળેલ કે કોઠારીયા સોલવન્ટ પાસે, શિવ હોટલ નજીક કોઈ અકસ્માત સબબ આ વ્યક્તિ ત્યાં ઈજાગ્રસ્ત પડેલ હતા.

ઇમરજન્સી વિભાગમાં સારવાર દરમ્યાન આ અજાણ્યા વ્યક્તિએ દમ તોડી દીધો હતો. સિવિલ હોસ્પિટલ ચોકીના સ્ટાફે પ્રથમ આજીડેમ પોલીસને જાણ કરેલી. પણ બનાવ ગોંડલ હાઇવે પર રિયલ ટેક સીએનસી પ્રા. લી. કારખાનું અને ખોડિયાર ટી સ્ટોલ વચ્ચે બન્યો હોય, આ હદ શાપર પોલીસમાં આવતી હોય જેથી શાપર પોલીસમાં જાણ કરાતા એએસઆઈ મુકેશભાઈ ચૌહાણ સહિતના દોડી આવ્યા હતા.

મૃતકના સગાની તપાસ કરતા તેઓ મળી આવતા મૃતકનું નામ દિલીપભાઈ નટુભાઈ સોલંકી (ઉં. વ. 45, રહે. શાપર ગંગા ગેટ મફતિયાપરા) હોવાનું જાણવા મળેલ.
મૃતક મજૂરી કામ કરતા, અપરણિત હતા. તેમના ભાઈ કોઠારીયા સોલ્વન્ટમાં રહેતા હોવાથી ત્યાં આવ્યા હતા. પછી રાત્રે ચા પાણી પીવા બહાર નીકળ્યા ત્યારે અકસ્માત થયો હતો. પોલીસે મૃતદેહ પીએમમાં ખસેડી અકસ્માત સર્જી નાશી જનાર વાહન ચાલકને શોધવા તજવીજ કરી હતી.