મોરબી જિલ્લામાં ભાજપનાં નવ મંડલોનાં વિભાજનમાં 15 યુવા આગેવાનોને મળશે પ્રમુખ બનવાની તક

પ્રદેશની ગાઈડલાઈન મુજબ 40 વર્ષના યુવાનો ઉમેદવારી નોંધાવી શકશે

(જીગ્નેશ ભટ્ટ દ્વારા)મોરબી,તા.13
સમગ્ર ગુજરાતની અંદર હાલમાં ભાજપ દ્વારા જુદા જુદા મંડલના પ્રમુખની વરણી માટેની પ્રક્રિયા હાથ ધરવામાં આવી છે જોકે સામાન્ય રીતે ભાજપ દ્વારા સીધા જ પ્રમુખ ના નામ જાહેર કરવામાં આવતા હતા .

પરંતુ આ વખતે તેમાં ફેરફાર કરીને જે તે વિસ્તારની અંદર જે કોઈ વ્યક્તિ પ્રમુખ બનવા માંગતા હોય તેમના ફોર્મ ભરવાના અને ત્યારબાદ પ્રદેશમાંથી પ્રમુખના નામની જાહેરાતો કરવામાં આવશે તેવું જાણવા મળી રહ્યું છે જોકે આ વખતે ભાજપ સંગઠનની અંદર ગાઇડલાઇનમાં ઘણા બધા ફેરફારો કરવામાં આવ્યા છે અને કેટલાક મંડલોના વિભાજન કરવામાં આવે તેવી પરિસ્થિતિ છે જેથી મોરબી જિલ્લો કે જે અત્યાર સુધી નવ મંડલનો જિલ્લો હતો તે હવે આગામી સમયમાં 15 મંડલનો જિલ્લો બને તેવી ચર્ચા આગેવાનોમાં ચાલી રહી છે.

ભાજપ દ્વારા મોરબી જિલ્લામાં આવતા નવ મંડલો જેમાં મોરબી શહેર, મોરબી તાલુકા, માળિયા શહેર, માળીયા તાલુકા, હળવદ શહેર, હળવદ તાલુકા, વાંકાનેર શહેર, વાંકાનેર તાલુકા અને ટંકારા તાલુકા મંડલનો સમાવેશ થાય છે અને આ નવ મંડળોના પ્રમુખ પદ માટે થઈને આ વખતે પ્રદેશ ભાજપ દ્વારા જે નવી ગાઈડલાઈન જાહેર કરવામાં આવી છે કે 40 વર્ષના યુવાને પ્રમુખ પદ માટે પોતાની ઉમેદવારી નોંધાવી શકે છે તે મુજબ ઉમેદવારી પત્રો ભરવામાં આવ્યા હતા.

ત્યારે મોરબી જિલ્લામાં જે નવ મંડલો હતા તે મંડલમાં નવી ગાઈડલાઈન મુજબ વધારો થશે જેથી કરીને પ્રમુખની સંખ્યામાં આગામી સમયમાં વધારો થાય તેવી ચર્ચા ચાલી રહી છે. અત્યાર સુધી જે નવ મંડલો હતા તેમાં ટંકારા, હળવદ, વાંકાનેર અને મોરબી મંડલમાં વિભાજન કરવામાં આવશે જેથી કરીને નવા છ મંડલો બનશે તેવી માહિતી જાણવા મળી રહી છે.

સૂત્રો પાસેથી મળતી વિગત પ્રમાણે હવે જે નવા મંડળો બનશે તેમાં મોરબી શહેર મંડલ, ટંકારા શહેર મંડલ, ટંકારા તાલુકા મંડલ, વાંકાનેર શહેર મંડલ, માટેલ મંડલ, જડેશ્વર મંડલ, હળવદ ગ્રામ્ય મંડલ, ચરાડવા મંડલ, માળીયા શહેર મંડલ, માળિયા તાલુકા મંડલ તેમજ મોરબી તાલુકા ભાજપનું વિભાજન કરીને નવા ચાર મંડલો બનાવવામાં આવ્યા છે .

જેમાં આમરણ મંડલ, જેતપર મંડલ,  બગથળા મંડલ અને ઘુટુ મંડલનો સમાવેશ થાય છે જેથી કરીને અત્યાર સુધી મોરબી જિલ્લામાં ભાજપના જુદા જુદા નવ મંડલોના નવ પ્રમુખ બનતા હતા પરંતુ હવે આગામી સમયમાં કુલ મળીને 15 મંડલો બનશે જેથી કરીને 15 યુવા આગેવાનોને પ્રમુખ બનવાની તક મળશે. તેવું જાણવા મળી રહ્યું છે.