રવિ કિરણ : ‘પ્રતિભાને સાંપડયો તકનો સાથ’


Advertisement

ક્રિકેટ અનિશ્ચીતતાઓથી ભરેલી રમત છે. કોઇ નાટકીય વળાંકે રમતના પરીણામો બદલાઇ જતા વાર નથી લાગતી. આ મહાન રમત સાથે સાડા ત્રણ દાયકા ઉપરાંત જોડાઇ રહેવાનું સૌભાગ્ય મને પ્રાપ્ત થયું છે. આ સમય દરમ્યાન કેટલીય એવી ઘટનાનો સાક્ષી બનવાનું થયું છે કે જે અંદરથી ભીંજવી છે. તો વળી, એવા પ્રસંગો પણ જોયા છે જયાં દર્દ-પીડાથી કાળજુ કાંપી જાય. આવી જ તમામ વાતો આ માધ્યમથી વહેચવાનો પ્રયત્ન કરૂ છું.

ભારત જેવા વિશાળ દેશમાં ક્રિકેટ ધર્મની જેમ પુજાય છે. દરેક નાના બાળકને કે યુવાનને આ રમતમાં પોતાનું ભવિષ્ય બનાવવું છે. અને પ્રમાણિકપણે કહુ તો આ સહેલુ નથી. રાજકોટ જેવા શહેરમાં પણ 1પ-20 કોચીંગ કેમ્પ ચાલતા હશે. દરેક કેમ્પમાં ફકત સો બાળકો ગણીએ તો પણ દોઢ-બે હજારની સંખ્યા થાય અને આવો સરવાળો જો આખા દેશનો માંડીએ તો ? કોઇ IIT કે UPSC ની પરીક્ષા પાસ કરવા કરતા પણ વધુ મુશ્કેલ કામ દેશ માટે કે રાજય માટે ક્રિકેટ રમવું એ છે. વળી તેમાં યોગ્ય સમયે તક મળવી, તક મળે ત્યારે સારૂ પ્રદર્શન કરવું, તેમ બેટસમેન કે બોલર હો અને તમારા માટે એ સમયે ટીમમાં જગ્યા હોવી એ બધુ એક સાથે કોઇ બહુ સારા સંયોગમાં જ સર્જાઇ શકે અને એટલે જ ક્રિકેટને એક કેરીયર ઓપ્શન તરીકે પસંદ કરતા પહેલા ઘણા વિશ્ર્લેષણની જરૂર પડતી હોય છે.

પરંતુ જો ઉંચા કલાસની ટેલેન્ટ હોય, ભગીરથ મહેનત કરવાની તૈયારી હોય તો નસીબ આડેથી પાંદડુ હટતા સમય પણ નથી લાગતો. આજે આવી જ એક અનેરી અને રસપ્રદ ઘટના વિષે વાત કરવી છે. ર011-12ની ભારતીય ડોમેસ્ટીક ક્રિકેટ સીઝનની શરૂઆત પહેલા તૈયારી રૂપે હૈદ્રાબાદની રણજી ટ્રોફી ટીમનો કોચીંગ કેમ્પ ચાલતો હતો. 21 દિવસના એ કેમ્પમાં ટુર્નામેન્ટ પહેલા થતી બધી તૈયારીઓ પર ટીમના કોચ અને સપોર્ટ સ્ટાફ પુરેપુરૂ ધ્યાન આપી રહ્યા હતા. ડોમેસ્ટીક સીઝનની શરૂઆત વિજય હઝારે ટ્રોફી વન ડે ટુર્નામેન્ટથી થવાની હતી એટલે ટીમ મેનેજેમન્ટે નકકી કર્યુ કે એક બે પ્રેકટીસ મેચ પણ રમવી જોઇએ. અંદરોઅંદર રમવા કરતા કોઇ બહારની સારી ટીમ જોડે મેચ રમવાનું નકકી થયું. એ સમયમાં સ્ટેટ બેંક ઓફ હૈદ્રાબાદથી ટીમ ઘણી મજબુત ગણાતી. બોર્ડ દ્વારા આયોજીત કોર્પોરેટ ટ્રોફીમાં પણ સ્ટેટ બેંક ઓફ હૈદ્રાબાદ ચેમ્પીયન બનેલી ટીમ હતી. આ ટીમમાં કોઇએ સમયના રણજી ખેલાડી ન હતા પણ અનુભવી-એન્ટીવ અને અમુક યુવા ખેલાડીઓના કોમ્બીનેશનથી ભરેલી સ્ટેટ બેંક ઓફ હૈદ્રાબાદની ટીમ કોઇ સ્ટેટ ટીમથી ઉતરતી ટીમ ન હતી.

સ્ટેટ બેંક ઓફ હૈદ્રાબાદના કેપ્ટન ભૂતપૂર્વ રણજી ખેલાડી અને ધુરંધર ઓલરાઉન્ડર ડેનીયલ મનોહર જોડે વાત કરીને મેચની તારીખ નકકી કરવામાં આવી. સ્ટેટ બેંકની ટીમના મુખ્ય ફાસ્ટ બોલર આ મેચના દિવસે કોઇ કૌટુંબિક પ્રસંગમાં વ્યસ્ત હોવાથી ટીમને આ પ્રેકટીસ મેચ માટે એક સારા ફાસ્ટ બોલરની જરૂર હતી. કેપ્ટન ડેનીયલ મનોહરે પોતાના મિત્ર વર્તુળ અને કોચીંગ સ્ટાફ દ્વારા પ્રસ્થાન શરૂ કર્યા. આ સમયે તેમને એક સાથી ક્રિકેટરે યુવા ફાસ્ટ બોલર રવિ કિરણનું નામ ખુબ સારા ફીડબેક સાથે સુચવ્યું. ફકત 20 વર્ષના નેચરલ એકશન વામા ફાસ્ટબોલર રવિ કિરણને આ રીતે સાવ અચાનક જ રાજયની રણજી ટીમ સામે રમવાની તક મળી ગઇ. કેપ્ટન ડેનીયર મનોહરે પોતાના અનુભવ અને કપ્તાનીની કુનેહ વાપરીને રવિ કિરણની બોલીંગનો ભરપુર ઉપયોગ કર્યો. રવિ કિરણે પણ પોતાની ટેલેન્ટ અને અત્યાર સુધી કરેલી કાળી મજુરી જેવી મહેનતના જોરે જોરદાર બોલીંગ કરી. કોઇને માન્યામાં પણ ન આવે તેવા અદભુત બોલીંગ પ્રદર્શનથી રવિ કિરણે હૈદ્રાબાદની રણજી ટીમના ધુંઆધાર બેટીંગ ઓર્ડરની કમર તોડી નાખી. 10 ઓવરના સ્પેલમાં 4 વિકેટ ઝડપી રવિ કિરણે સ્ટેટ બેંક ઓફ હૈદ્રાબાદ માટે એ મેચમાં વિજયી પ્રદર્શન કર્યુ.

મેચ પછી તરત જ હૈદ્રાબાદ ક્રિકેટ એસોસીએશન, તેના પસંદગીકારો અને પ્રમુખ શિવલાલ યાદવ હરકતમાં આવી ગયા. આ યુવા ફાસ્ટ બોલર રવિ કિરણ કોણ છે ? કયાનો છે ? શું કરે છે તેવા પ્રશ્નો પુછયા લાગ્યા. કેપ્ટન ડેનીયલ મનોહરનું મંતવ્ય પણ પુછવામાં આવ્યું અને રાતોરાત રવિ કિરણને હૈદ્રાબાદની ટીમના સંભવિત ખેલાડીઓમાં સમાવી લેવામાં આવ્યા. આવા ચમત્કારી અને નાટકીય પ્રવેશ પછી રવિ કિરણ હૈદ્રાબાદ ટીમનો અભિન્ન હિસ્સો બની ગયા. રમતના ત્રણેય ફોર્મેટ (ટી-20, વન-ડે, અને મલ્ટી ડે)માં તેઓ મુખ્ય બોલર બનીને હૈદ્રાબાદ માટે આશરે પ0 રણજી મેચ, 40 વન ડે મેચ અને 32 ટી-20 મેચ રમી ચુકયા છે. રવિ કિરણનો દાખલો એ વાત સિધ્ધ કરે છે કે જો સો ટચની કુશળતા હોય, ભીષણ મહેનત કરવાની તૈયારી હોય, યોગ્ય માર્ગદર્શન હોય અને સારા સંયોગનો સાથ હોય તો ખેલાડી નીખર્યા વિના રહેતો નથી.

Advertisement
Advertisement