મવડી વિસ્તારમાં આવેલ એક ટાઉનશીપનો બનાવ

‘મારો પરીવાર મને સમજતો નથી, મારે તારી સાથે જ લગ્ન કરવા છે’ કહીં યુવતી સાથે દુષ્કર્મ

Hiનો મેસેજ કરી યુવતીને , હું મારી લાઈફમાં એકલો જ છું તારી સાથે ફ્રેન્ડશીપ કરવી છે કહી મિત્રતા બાંધી, અનૈતિક માંગણી કરતાં યુવતીએ સબંધ તોડી નાખતા માફી માંગી ફરીવાર ફ્રેન્ડ બનાવી

♣આરોપીના પરીવારને જાણ થતાં યુવતીએ ફરીવાર સબંધ તોડી નાંખ્યો, તો આરોપી ઘરે પહોંચ્યો અને તું જ મારું સર્વસ્વ છે કહીં યુવતીનું સર્વસ્વ લૂંટી લીધું

♣તાલુકા પોલીસે ગુનો નોંધી આરોપીને પકડવા ઘરે પહોંચી તો વરરાજો બની ઉભો હતો, લીલા તોરણે જ હવસખોરને પકડી લોકઅપમાં નાખ્યો

રાજકોટ. તા.19
મવડી વિસ્તારમાં આવેલ એક ટાઉનશીપમાં મારો પરીવાર મને સમજતો નથી, મારે તારી સાથે જ લગ્ન કરવા છે કહીં યુવતી સાથે દુષ્કર્મ કરનાર શખ્સને પોલીસે લીલા તોરણે જ  પકડી લોકઅપમાં નાંખ્યો હતો. યુવતીને મેસેજ કરી હું મારી લાઈફમાં એકલો જ છું તારી સાથે ફ્રેન્ડશીપ કરવી છે કહી મિત્રતા બાંધ્યો હતો અને બાદમાં અનૈતિક માંગણી કરતાં યુવતીએ સબંધ તોડી નાંખતા માફી માંગી ફરીવાર ફ્રેન્ડ બનાવી હતી.

તાલુકા પોલીસે ગુનો નોંધી આરોપીને પકડવા ઘરે પહોંચી તો વરરાજો બની ઉભો હતો.મવડી વિસ્તારમાં રહેતી યુવતિ સાથે મિત્રતા કેળવી લગ્નની લાલચ આપી બળજબરી પૂર્વક શારીરીક સંબંધ બાંધી લીધાની ફરિયાદ નોંધાવતા તાલુકા પોલીસે દુષ્કર્મ સહિતની કલમ હેઠળ આરોપી સામે ગુનો નોંધી શોધખોળ હાથ ધરી હતી.
બનાવ અંગે મવડી વિસ્તારમાં રહેતી 20 વર્ષીય યુવતિએ નોંધાવેલ ફરીયાદમાં આરોપી તરીકે લાલુભાઈ પારેખ ટાઉનશીપમાં રહેતા દિલીપ ચાવડાનું નામ આપતાં તાલુકા પોલીસે દુષ્કર્મની કલમ હેઠળ ગુનો નોંધી આરોપીની શોધખોળ આદરી હતી.

વધુમાં ફરિયાદીએ જણાવ્યું હતું કે, તેણી જે ટાઉનશીપમાં રહે છે ત્યાં પોતાએ પાળેલ પોપટ સાથે ગ્રાઉન્ડમાં બેઠી હોય ત્યારે આરોપી તેની સામે એકી ટસે જોતો હતો. જે બાદ આરોપીએ યેનકેન પ્રકારે તેણીના મોબાઈલ નંબર મેળવી લીધાં હતાં અને હાઈના મેસેજથી શરૂઆત કરી હતી. બાદમાં અવાર-નવાર મારે તારી સાથે ફ્રેન્ડશીપ કરવી છે, હું મારી લાઈફમાં એકલો જ છું, મારા પરીવાર વાળા મને સમજતા નથી તેવા મેસેજ કર્યા હતાં. બાદમાં બંને વચ્ચે મિત્રતા બંધાઈ હતી.

બાદમાં બંને અવારનવાર ફોનમાં મેસેજથી અને રૂબરૂ મળતાં હતાં. દરમિયાન બંને એક દિવસ સાથે લિફ્ટમાં જતાં હતાં ત્યારે આરોપીએ અનૈતિક માંગણી કરતાં તેણી ગુસ્સે ભરાઈ હતી અને મિત્રતાના સબંધ તોડી નાંખી આરોપીનો નંબર પણ બ્લોક કરી નાંખ્યો હતો. જે બાદ આરોપીએ અન્યના મોબાઈલ નંબર પરથી ફોન કરી માફી માંગી હતી અને ફરીવાર અનૈતિક માંગણી નહિ કરે તેમ કહીં સમાધાન કર્યું હતું અને ફરી બંને વાતચીત કરવાં લાગ્યાં હતાં.

તે દરમિયાન આ વાતની આરોપીની માતાને જાણ થતાં યુવતીને તેને બોલાવી હતી અને સબંધ તોડી નાંખવાની વાત કરતાં યુવતીએ ફરીવાર આરોપી સાથેના તમામ સબંધ તોડી નાંખી આરોપીનો મોબાઈલ નંબર બ્લોક કરી નાંખ્યો હતો. જે બાદ ગઈ તા.02 ના યુવતીના માતા-પિતા બહારગામ ગયાં તે વાતની જાણ આરોપીને થતાં તે ઘરે ઘસી આવ્યો હતો અને મારા માતાપિતા મારી મરજી વિરુદ્ધ અન્ય જગ્યાએ લગ્ન કરવાની વાત કરે છે, પરંતુ મારે તો તારી સાથે જ લગ્ન કરવા છે કહી બળજબરીથી શરીર સબંધ બાંધ્યો હતો.

જે બાદ યુવતીએ આરોપીનો સંપર્ક કરતાં મેસેજમાં આરોપીએ કહ્યું કે, મારા બીજે લગ્ન નક્કી થયા છે, તું હવે મને મેસેજ કે કોલ ન કરતી મારે ઘરમાં તકલીફ પડે છે કહી તેણી સાથે વિશ્વાસઘાત કર્યો હતો.

જે બાદ તેણી પોલીસ મથકે પહોચી ફરીયાદ નોંધાવી હતી. બનાવ અંગેની ફરીયાદ પરથી પીઆઈ ધવલ હરીપરા અને ટીમે ગુનો નોંધી આરોપીના ઘરે તપાસ માટે જતાં આરોપીના ગઈકાલે લગ્ન હોવાનું સામે આવ્યું હતું. જે બાદ પોલીસે જાન ઘરે પહોંચતા જ આરોપી દિલીપની ધરપકડ કરી સીધો લોકઅપમાં ધકેલી દિધો હતો.