10% પ્રીમિયમ વધારો ફક્ત નવી પોલિસીઓ પર જ લાગુ થશે : Irdai

10% પ્રીમિયમ વધારો ફક્ત નવી પોલિસીઓ પર જ લાગુ થશે : IRDAI

India | 18 April, 2025 | 11:56 AM

◙ વરિષ્ઠ નાગરિકો માટે આરોગ્ય વીમા અંગે નિયમનકારે સ્પષ્ટતા જારી કરી

સાંજ સમાચાર

◙ આ વર્ષે 31 જાન્યુઆરી પછી ફાઇલ કરાયેલી પોલિસીઓ પર લાગુ

નવી દિલ્હી, તા.18
ઈન્સ્યોરન્સ રેગ્યુલેટરી એન્ડ ડેવલપમેન્ટ ઓથોરિટી ઓફ ઈન્ડિયા (IRDAI) એ સ્પષ્ટતા કરી છે કે, વરિષ્ઠ નાગરિકો માટે સ્વાસ્થ્ય વીમા પ્રીમિયમમાં વાર્ષિક 10% વધારાની મર્યાદા આ વર્ષે 31 જાન્યુઆરી પછી ફાઇલ કરાયેલી અથવા પુન:પ્રાઈસની પોલિસી પર જ લાગુ થશે. આ નિયમ અગાઉની નીતિઓને લાગુ પડતો નથી.

પ્રાપ્ત થતી માહિતી અનુસાર, આ સ્પષ્ટીકરણ વીમા કંપનીઓના આ નવા નિયમના અમલીકરણ અંગે માર્ગદર્શન માંગતી અનેક પ્રશ્નોના પગલે આવે છે. આ નિયમ 60 વર્ષ અને તેથી વધુ ઉંમરના પોલિસીધારકોને પ્રીમિયમમાં ભારે વધારાથી બચાવવા માટે બનાવવામાં આવ્યો છે.

IRDAI કહે છે કે, વૃદ્ધોની આવક મર્યાદિત છે અને આ લોકો પ્રીમિયમમાં વધારાથી વધુ પ્રભાવિત થાય છે. 31 જાન્યુઆરી પહેલા જારી કરવામાં આવેલી પોલિસી પર પ્રીમિયમ 10% થી વધુ વધી શકે છે. તે 60% સુધી પણ વધી શકે છે. આ પ્રીમિયમ દાવા અનુસાર નક્કી કરવામાં આવે છે.

સ્વાસ્થ્ય વીમા પોલિસીની કિંમતો સામાન્ય રીતે દર બે-ત્રણ વર્ષે સુધારવામાં આવે છે અને જૂની પોલિસીઓ પાંચ-છ વર્ષ પછી બંધ કરવામાં આવે છે. વીમા કંપનીના એક અધિકારીએ કહ્યું કે જો જૂની પોલિસીની કિંમતો ફરીથી નક્કી કરવામાં ન આવે તો તેનું પ્રીમિયમ 10 ટકાથી વધુ વધી શકે છે.

જોકે IRDAIએ આ સંબંધમાં કોઈ સત્તાવાર નિવેદન આપ્યું નથી, પરંતુ વીમા કંપનીઓને કહેવામાં આવ્યું છે કે, આ નિયમ ત્યારે જ લાગુ થશે જ્યારે પોલિસીની કિંમતો ફરીથી નક્કી કરવામાં આવશે. ઉદાહરણ તરીકે, જો પોલિસીની કિંમત છેલ્લે જાન્યુઆરી 2025માં નક્કી કરવામાં આવી હતી.

તો આગલી વખતે આ નિયમ 2028માં લાગુ થશે. IRDAIના 30 જાન્યુઆરીના પરિપત્રમાં માત્ર સુધારાઓનો ઉલ્લેખ છે, જે કેટલીક અસ્પષ્ટતા પેદા કરે છે.

તે જ સમયે, રેગ્યુલેટરે બીજો નિયમ બનાવ્યો છે જે મુજબ પોલિસી બંધ કરતા પહેલા રેગ્યુલેટર પાસેથી મંજૂરી લેવી પડશે. આનાથી પોલિસીધારકો, ખાસ કરીને વૃદ્ધો, લાંબા ગાળાના કવરને ગુમાવતા અટકાવશે.