માધાપર, કોઠારીયામાં કારખાના સહિત 10 મિલ્કત સીલ

Local | Rajkot | 24 January, 2025 | 03:44 PM

બાકીવેરા માટે સત્યસાંઇ અને યુનિ. રોડના ત્રણ ઘરના નળ જોડાણ પણ કાપી નંખાતા ચેક જમા : ગાયત્રીનગરમાં બે દુકાનોને પણ તાળા મરાયા

સાંજ સમાચાર

રાજકોટ, તા. 24
મનપાની વેરા વસુલાત શાખા દ્વારા ચાલતી રીકવરી અને બાકીદારોની મિલ્કત સીલ કરવાની ઝુંબેશમાં આજે માધાપર, સમ્રાટ, કોઠારીયા રોડના જુદા જુદા ઔદ્યોગિક વિસ્તારોમાં કારખાના સહિતની વધુ 10 મિલ્કતો સીલ કરવામાં આવી હતી. તો કાલાવડ અને યુનિ. રોડ પર રહેણાંક વિસ્તારમાં બાકીદારોના નળ કનેકશન કાપવામાં આવતા દોડધામ થઇ હતી.

રીકવરી ટીમ દ્વારા વોર્ડ નં.3માં ગાંધી સોસાયટી સામે માધાપર ઇન્ડ. એરીયામાં એક મિલ્કત સીલ કરાઇ હતી તો બીજી મિલ્કતમાંથી 10.80 લાખની રીકવરી થઇ હતી. વોર્ડ નં.4ના ઉત્સવ પાર્ક અને વોર્ડ નં.5ના રણછોડનગર સોસાયટીના ફલેટમાં સીલની કાર્યવાહી કરતા ચેક જમા થયા હતા. કુવાડવા રોડ જકાતનાકાની બાજુમાં એક મિલ્કતને તાળા મારવામા આવ્યા હતા.

ન્યુ રાજકોટમાં વોર્ડ નં.10માં સત્યસાંઇ હોસ્પિટલ રોડ બાજુમાં આસોપાલવ ઘર નં.91, 92માં નળ જોડાણ કાપતા વેરાના ચેક ઘર માલિકોએ આપી દીધા હતા. યુનિ. રોડના શકિતનગરમાં આવેલ શગુન એપાર્ટમેન્ટમાં પ્રથમ માળે નળ કનેકશન કાપી નાખવામાં આવ્યું હતું. વોર્ડ નં.13ના ગોંડલ રોડ પર ક્રિસ્ટલ કોમ્પ્લેક્ષમાં દુકાન, માલવિયાનગરમાં દોશી હોસ્પિટલ રોડ પર ગાયત્રી કોમ્પ્લેક્ષમાં ઓફિસ સીલ કરવામાં આવી હતી. સમ્રાટ ઇન્ડ., મણીનગર ઇન્ડ. એરીયામાં રીકવરી થઇ હતી.

વોર્ડ નં.14માં ગાયત્રીનગર મેઇન રોડ પર મારૂતિનંદન કોમ્પ્લેક્ષમાં બાકી માંગણા બદલ બે દુકાનોને સીલ મારવામાં આવ્યા હતા. તો વોર્ડ નં.14માં કોઠારીયા રોડના મારૂતિ ઇન્ડ. એરીયામાં, પરધામ ઇન્ડ. એરીયામાં બે યુનિટ સીલ કરાયા હતા.

નેશનલ હાઇવે સહજાનંદ પાર્કમાં સૂચિત સોસાયટીમાં ખોડલ પ્લાસ્ટિકના પ્લોટ, મારૂતિ ઇન્ડ. એરીયામાં એક કારખાનાને સીલ મારવામાં આવ્યા હતા. તો વોર્ડ નં.18માં કોઠારીયામાં રોલેક્ષ પાછળ વરૂણ ઇન્ડ. એરીયામાં ત્રણ કારખાનામાંથી ચેક જમા થયા હતા.

બાબરીયા કોલોની પાછળ નવનીત ડેરી સામે સીલની કાર્યવાહી કરતા રીકવરી થઇ હતી. આજે બે મિલ્કતને ટાંચ જપ્તી નોટીસ અપાઇ હતી. આજના દિવસમાં 29.46 લાખની રીકવરી થઇ હતી અને ચાલુ નાણાકીય વર્ષની આજ સુધીની આવક 343.11 કરોડની આવક થઇ છે.

ડે.કમિશ્નર સી.કે.નંદાણી, આસી.કમિશ્નર સમીર ધડુક, મેનેજર વત્સલ પટેલ, સિધ્ધાર્થ પંડયા, મયુર ખીમસુરીયા સહિતની ટીમ દ્વારા આ સીલીંગ અને રીકવરી ઝુંબેશ ચાલી રહી છે.