જામનગરના વધુ એક કારખાનેદારે રૂા.21 લાખ ગુમાવ્યાની ફરિયાદ

Local | Junagadh | 19 February, 2025 | 02:54 PM

સાંજ સમાચાર

જામનગર તા.19: જામનગરના દરેડ GIDC ફેસ-03 મા યશબ્રાસના નામે બ્રાસ સ્ક્રેપ વ્યવસાય કરતા અને જામનગરના સિદ્ધિ પાર્ક મેહુલ નગર શેરી નંબર 2 માં રહેતા વેપારીને દિલ્હીના બે ઠગ શખ્સોનો ભેટો થયો હતો. આરોપીઓએ જામનગરના વેપારી પાસેથી બ્રાસનો સ્ક્રેપ ખરીદી લીધા બાદ મામૂલી રકમ ચૂકવી 21.41 લાખ રૂપિયાનું બુચ મારી દેતા મામલો પોલીસ મથકે પહોંચ્યો છે હાલ દિલ્હીના શખ્સો સામે પોલીસે વિશ્વાસઘાત સહિતની કલમો હેઠળ ફરિયાદ નોંધ કાર્યવાહી હાથ ધરી છે.

આ મામલે જાણવા મળતી વિગત અનુસાર પંચકોષી બી ડીવીજન પોલીસ મથકમાં જયસુખભાઇ બાવજીભાઇ હાપલીયા (ઉ.વ.48 ધંધો-વેપાર રહે- મકાન નં-ડી-50 સિધ્ધી પાર્કે મેહુલનગર શેરી નં-02 જામનગર) એ આરોપી સિરાજ સૈફી ઉર્ફે બંટી તથા આરોપી રોહીતભાઇ કાનાણી (રહે બન્ને-પ્લોટ નં-એ2/45,સાઇટ 5,કસના ઇન્ડસ્ટીજ એરીયા ગ્રેટર નોઇડા ગૌતમ બુધ્ધ નગર દિલ્હી) સામે ફરિયાદ નોંધાવી હતી

જેમાં જણાવાયા અનુસાર જયસુખભાઇ જામનગરના દરેડ જીઆઇડીસી ફેસથ્રી માં યસ બ્રાસના નામે કારખાને ચલાવતા હોય અને બ્રાસ સ્ક્રેપનો વેપાર/ધંધો કરતા હતા. તે દરમ્યાન સિરાજે કોઇ ડીઝીટલ પ્લેટફોર્મ મારફતે જયસુખભાઈ નો ટેલીફોનીક સંપર્ક કરી તેમની પાસેથી તેમની પ્રોડક્સ ખરીદવા માટે જણાવ્યું હતું.

ત્યારબાદ જયસુખભાઇને તેમના ગ્રેટર નોઇડા ખાતે આવેલ કારખાને બોલાવી તેમના કારખાનાની વીજીટ કરાવી પોતાને મોટો વેપાર ધંધો છે. તેવું બતાવી આંબા આબલી બતાવી હતી.

આમ જયસુખભાઇને વિશ્વાસમા લીધેલ અને ત્યાર બાદ જયસુખભાઇ પાસેથી કી.રૂ.31,36,165 રૂપીયાનો વહેચાણ અર્થે બ્રાસનો માલ મંગાવી લીધા હતા. ત્યારબાદ તેના બદલામા આરોપીઓએ રૂ.9,95,000 જેવી મામૂલી રકમ જ જમા કરાવી હતી અને હજુ પણ આ માલ પૈકી રૂ.21,41,165 જે જયસુખભાઇને લેવાના નિકળતા હતા.

આ રૂપિયા આપવામાં આરોપીઓએ આનાકાની કરી હતી. વારંવાર ઉઘરાણી જતા આરોપીઓએ રકમ ન આપતા અંતે મામલો પોલીસ મથકે પહોંચ્યો છે. બન્ને આરોપીઓએ લેણી નિકળતી રકમ ભુલી જવાનુ અને નહી ચુકવવાનુ કહ્યું હતું. ત્યારબાદ આ મામલે જયસુખભાઈએ બંને શખ્સ સામે પંચકોશીબી ડિવિઝન પોલીસ મથકમાં ફરિયાદ કરતા હાલ પોલીસે આરોપી સુધી પહોંચવા તપાસના ચક્રોગતિમાન કર્યા છે.