બેંકોમાંથી અનક્લેમ્ડ ડિવિડન્ડ - વ્યાજ મેળવવાનું સરળ : 4 નોમીની રાખી શકાશે

બેંકિંગ કાનૂન સુધારા વિધાયક લોકસભામાં પસાર

ન્યુ દિલ્હી,તા.4
બેંકિંગ સુધારા બિલ 2024 મંગળવારે (3 ડિસેમ્બર) લોકસભામાં પસાર થઈ ગયું છે. આ બેંકિંગ એમેન્ડમેન્ટ બિલ હેઠળ ઘણા મહત્વપૂર્ણ ફેરફારો કરવામાં આવશે. રિઝર્વ બેન્ક ઓફ ઈન્ડિયા એક્ટ 1934, બેન્કિંગ રેગ્યુલેશન એક્ટ 1949, સ્ટેટ બેન્ક ઓફ ઈન્ડિયા એક્ટ 1955 અને અન્ય કાયદાઓમાં સુધારો કરશે.

નાણામંત્રી નિર્મલા સીતારમણે આ બિલ લોકસભામાં રજૂ કર્યું હતું. આ બિલમાં કુલ 19 સુધારા પ્રસ્તાવિત છે. સંસદના વર્તમાન શિયાળુ સત્રમાં સરકાર દ્વારા આ બિલ લોકસભામાં પસાર કરવામાં આવ્યું છે.

► નવા કાયદાના અમલ પછી, તમે હવે એક બેંક ખાતા માટે 4 નોમિની ઉમેરી શકશો 
નવા કાયદાના અમલ પછી, ખાતાધારકો હવે એક બેંક ખાતા માટે 4 નોમિની ઉમેરી શકશે. આ ફેરફાર એ સુનિશ્ચિત કરવા માટે કરવામાં આવી રહ્યો છે કે દાવા વગરની રકમ યોગ્ય વારસદાર સુધી પહોંચે. માર્ચ 2024 સુધી બેંકોમાં લગભગ 78,000 કરોડ રૂપિયાની રકમ છે, જેના પર કોઈ દાવો કરવામાં આવ્યો નથી.

સરકાર સ્ટેટ બેંક ઓફ ઈન્ડિયા એક્ટ અને બેંકિંગ કંપની એક્વિઝિશન એક્ટમાં સુધારા કરી રહી છે. આ સુધારા સાથે, 7 વર્ષ માટે દાવો ન કરાયેલ ડિવિડન્ડ, શેર, વ્યાજ અને મેચ્યોર બોન્ડની રકમ રોકાણકાર શિક્ષણ અને સંરક્ષણ ભંડોળ એટલે કે IEPF માં ટ્રાન્સફર કરી શકાય છે. આ સાથે, રોકાણકારો IEPF દ્વારા તેમના નાણાંનો દાવો કરી શકશે.

► સેન્ટ્રલ કો-ઓપરેટિવ બેંકના ડિરેક્ટરો હવે સ્ટેટ કો-ઓપરેટિવ બેંકમાં પણ કામ કરી શકશે
સેન્ટ્રલ કો-ઓપરેટિવ બેંકના ડિરેક્ટરો હવે સ્ટેટ કો-ઓપરેટિવ બેંકમાં પણ કામ કરી શકશે. સહકારી બેંકોના ડિરેક્ટરનો કાર્યકાળ વર્તમાન 8 વર્ષથી વધારીને 10 વર્ષ કરવામાં આવશે.

જોકે, આ નિયમ ચેરમેન અને સંપૂર્ણ સમયના ડિરેક્ટરોને લાગુ પડશે નહીં. સહકારી બેંકોની સ્થાપના ગ્રામીણ અને કૃષિ વિસ્તારોમાં સુવિધાઓ પૂરી પાડવા માટે કરવામાં આવી છે. હવે તમામ સહકારી બેંકો આરબીઆઈ હેઠળ આવે છે.

જાહેર ક્ષેત્રની બેંકોને ઓડિટર્સની ફી નક્કી કરવાનો અને ટોચના સ્તરની પ્રતિભાઓને હાયર કરવાનો અધિકાર મળશે. આનાથી બેંકની ઓડિટ ગુણવત્તામાં સુધારો થશે.

► બેંકોને RBIને રિપોર્ટ કરવાની સમયમર્યાદા બદલવાની છૂટ આપવામાં આવશે 
બેંકિંગ એમેન્ડમેન્ટ બિલ 2024ના નવા કાયદા હેઠળ બેંકોને RBIને રિપોર્ટિંગ કરવાની સમયમર્યાદા બદલવાની છૂટ આપવામાં આવશે. હવે આ રિપોર્ટ 15 દિવસ, એક મહિના અને ક્વાર્ટરના અંતે આપી શકાય છે.

અગાઉ, બેંકોએ દર શુક્રવારે આરબીઆઈને રિપોર્ટ સબમિટ કરવો પડતો હતો. બેંકિંગ એમેન્ડમેન્ટ બિલ 2024માં સૂચિત સુધારાઓ માત્ર બેંકોની કામગીરીમાં સુધારો કરશે નહીં પરંતુ રોકાણકારો અને ખાતાધારકોના હિતોનું પણ રક્ષણ કરશે.