ઇન્ટર્નશિપ માટે 1.25 લાખથી વધુ પોસ્ટ ખાલી

India | 19 February, 2025 | 05:03 PM

પીએમ ઇન્ટર્નશિપ હેઠળ કંપનીઓ યુવાનો માટે ઇન્ટર્નશિપની તક

સાંજ સમાચાર

નવી દિલ્હી :
દેશભરની સુપ્રસિદ્ધ કંપનીઓએ તેમને ત્યાં યુવાનોને ઇન્ટર્નશીપ પ્રદાન કરવા આમંત્રણ આપ્યું છે. પીએમ ઇન્ટર્નશિપ યોજનાનાં બીજા તબક્કા હેઠળ, યુવાનો પોર્ટલ પર જઈને ઓનલાઇન અરજી કરી શકે છે.

કંપનીઓ તરફથી પહેલાથી જ ઇન્ટર્નશીપ માટે અરજી કરવામાં આવી છે. કંપનીઓ દ્વારા ઇન્ટર્નશિપ માટે 1.25 લાખથી વધુ પોસ્ટ્સ ઉપલબ્ધ કરાઈ છે. હવે શૈક્ષણિક અને અન્ય મહત્વપૂર્ણ લાયકાત ધરાવતાં યુવાનો 12 મહિનાની ઇન્ટર્નશિપ કરવા માટે અરજી કરી શકે છે. કુલ 25 ક્ષેત્રોમાં, યુવાનોને ઇન્ટર્નશીપ કરવાની તક મળશે.

આમાં બેંકિંગ, ઓટોમોબાઈલ, ઉડ્ડયન, કૃષિ, ફાર્મા, જેમ્સ એન્ડ જવેલરી, આઇટી, હાઉસિંગ, પેટ્રોલિયમ, એફએમસીજી અને ઇન્ફ્રાસ્ટ્રક્ચર જેવાં ક્ષેત્રો શામેલ છે. 36 રાજ્યોનાં 740 થી વધુ જિલ્લાઓમાં, યુવાનોને ઇન્ટર્નશિપ તક મળશે. અરજી કરવા માટેની વય મર્યાદા 21 થી 24 વર્ષ નક્કી કરવામાં આવી છે.

12 મહિનાની ઇન્ટર્નશિપ માટે દર મહિને પાંચ હજાર રૂપિયા યુવાનોને આપવામાં આવશે, જેમાંથી કેન્દ્ર સરકાર 4500 રૂપિયા આપશે. જ્યારે કંપની સીએસઆર ફંડમાંથી પાંચસો રૂપિયા ખર્ચ કરશે. પસંદ કરેલાં યુવાનોને છ હજાર રૂપિયાની એકલ રકમ પણ આપવામાં આવશે. કેન્દ્ર સરકારે એક કરોડ યુવાનોને ઇન્ટર્નશીપ પ્રદાન કરવાનું લક્ષ્ય રાખ્યું છે.

યોજના માટે આ મુજબ અરજી કરી શકાય

♦ https://pminternship.mca.gov.in/login પર જાઓ અને યુથ રજિસ્ટ્રેશન પર ક્લિક કરો.

♦ આ પછી, તમારો મોબાઇલ નંબર દાખલ કરો અને પછી મોબાઇલ નંબર પર પ્રાપ્ત ઓટીપીના આધારે નોંધણી પ્રક્રિયા શરૂ કરો.

♦ તે પછી તમારે તમારી શૈક્ષણિક લાયકાત, જે ક્ષેત્રમાં ઇન્ટર્નશિપ કરવી હોય તે ફિલ્ડની પસંદગી અને અન્ય જરૂરી માહિતી ભરવાની રહેશે.

♦ 10 મું, 12 મું, આઇટીઆઇ, ડિપ્લોમામાંથી પોલિટેકનિક, બીએ, બીએસસી, બીકોમ, બીસીએ, બીબીએ અને બીફાર્મા પાસ થયેલાં ઉમેદવારો ઇન્ટર્નશિપ માટે પાત્ર હશે.

આ ઉમેદવાર અરજી કરી શકતાં નથી :-

♦ જે ઉમેદવારના કુટુંબની વાર્ષીક આવક આઠ લાખથી વધુ છે અથવા કુટુંબનાં કોઈપણ સભ્ય સરકારી નોકરી કરતાં હોય તે ઉમેદવાર અરજી કરી શકશે નહિં.

♦ જે ઉમેદવારોએ આઈઆઈટી, આઈઆઈએમ, આઈઆઈટી જેવી સંસ્થાઓ પાસેથી પોતાનો અભ્યાસ પૂર્ણ કર્યો છે તે ઉમેદવાર પાત્ર નથી.