2025માં 30 શ્રેષ્ઠ ટ્રાવેલ - ડેસ્ટિનેશનમાં ભારતમાંથી માત્ર પોંડિચેરીનો સમાવેશ!!

India, Travel | 19 November, 2024 | 05:07 PM

શ્રેષ્ઠ દેશ તરીકે કઝાખસ્તાન : ફ્રાન્સનું ટુલુઝ શહેર પ્રથમ સ્થાને: વિશ્વ વિખ્યાત ટ્રાવેલ મેગેઝિન ‘લોન્લી પ્લેનેટ’ની યાદી

સાંજ સમાચાર

નવી દિલ્હી, તા.19
વિશ્વના ફરવા લાયક સ્થળો અને પ્રવાસન વિશેની માહિતી પૂરી પાડતા વિશ્વવિખ્યાત ટ્રાવેલ-મેગેઝીન લોન્લી પ્લેનેટએ 2025 માટેની બેસ્ટ ઇન ટ્રાવેલ એટલે કે ફરવા માટેનાં શ્રેષ્ઠ 30 સ્થળોન યાદી બહાર પાડી છે.

આ યાદીમાં શ્રેષ્ઠ 30 ફરવા લાયક શહેરો, દેશો અને વિસ્તારો સમાવ્યા છે, એમાં ભારતના એક માત્ર પોન્ડિચેરી શહેરનો સમાવેશ થયો છે. આ યાદી પ્રમાણે ફરવા યોગ્ય શ્રેષ્ઠ દેશ તરીકે કઝાખસ્તાન પ્રથમ ક્રમે છે. જ્યારે ફ્રાન્સનું ટુલુઝ શહેર પહેલાં નંબરે છે. જ્યારે ફ્રાન્સનું ટુલુઝ શહેર પહેલાં નંબરે છે.

દક્ષિણ ભારતમાં પોન્ડિચેરી ચેન્નઇથી માત્ર 4 કલાકના અંતરે આવેલુ રમણીય શહેર છે. સમૃધ્ધ શહેર અને સંસ્કૃતિના સમન્વય જેવા દરિયાઇ વિસ્તાર પોન્ડિચેરીમાં મુસાફરોને જોઇતી તમામ બાબતો છે. અહીં દરિયાના ભેજની સાથોસાથ સ્થાનિક લોકોના હુંફાળા આવકારનું મિશ્રણ છે તો ફ્રાન્સ અને દક્ષિણ ભારતીય પ્રણાલીનું મિશ્રણ પણ છે.

પોન્ડિચેરી 1954 સુધી ફ્રાન્સની આઉટપોસ્ટ હતું. અહીં ફરવા માટે ફેબ્રુઆરી સૌથી શ્રેષ્ઠ મહિનો છે અને ચોમાસા પછી ત્યાંનું વાતાવરણ ઠંડુ અને શુષ્ક રહેતું હોય છે. અહીં રસ્તાની બન્ને બાજુએ વૃક્ષોની હારમાળા, મસ્ટર્ડ રંગની વિલા અને રમણીય સ્થળો આજે પણ ફ્રાન્સ સ્થાપત્ય અને સંસ્કૃતિને વાગોળે છે.

પોન્ડિચેરીમાં યુનિવર્સલ ટાઉનશીપ ઓરોવિલની ખાસ મુલાકાત લેવાની ભલામણ કરવામાં આવી છે, જ્યાં દુનિયાભરના લોકો એક સાથે એક પ્રયોગાત્મક સમુદાય તરીકે રહે છે. પોન્ડિચેરીનો ઓરોબિન્દો આશ્રમ પણ મસ્ટ-વિઝિટ જગ્યા છે.