લંડનથી આવેલી રાજકોટની આશા પટેલની મહાકુંભમાં સેવા શિબિર : ભંડારામાં હજારો લોકોને પીરસે છે ભોજન

Local | Rajkot | 24 January, 2025 | 04:45 PM

શિબિર સંચાલન, રસોઈ માટે આશાએ વેતન પર માણસો રાખ્યો છે : મહાકુંભમાં ખુલ્લામાં સુતા લોકોને તે ધાબળા વિતરણ કરે છે

સાંજ સમાચાર

પ્રયાગરાજ,તા.24
મહાકુંભમાં પુણ્ય કમાવવા માટે ગુજરાતી મહિલા આશા પટેલ લંડનથી આવી છે. તેણે મહાકુંભનગરમાં સેકટર ચારમાં સર્વ સમાજ સેવા શ્રીજી ટ્રસ્ટ રાજકોટના નામે શિબિર લગાવી છે.

તેની આ શિબિરમાં દરરોજ બે ટાઈમ ચાલતા ભંડારામાં હજારો લોકો પ્રસાદ ગ્રહણ કરી રહ્યા છે. સંસ્થાના માધ્યમથી આશા રાત્રે ખુલ્લા આકાશ નીચે સૂતા લોકોને ધાબળા વિતરણ પણ કરી રહી છે.

પ્રસાદમાં આશા ખીર-પુરી, પૌવા અને પુલાવ તેમજ સમોસા-ચટણ વગેરે પીરસે છે. પ્રસાદ બનાવવા માટે આશા રાજકોટથી પાંચ મહિલાઓને લઈને આવી છે. વાસણ પણ ગુજરાતથી લઈને આવી છે. અહીં માત્ર ભંડારાનું રાશન તે ખરીદે છે. 2 જાન્યુઆરીએ શરૂ થયેલો તેનો ભંડારો 12 ફેબ્રુઆરી સુધી ચાલશે.

આશાનો પુરો પરિવાર લંડનમાં રહે છે, ત્યાં તેના ભાઈનો દવાનો વેપાર છે. ભંડારો અને અન્ય સામાજીક કામ માટે આશાને પરિવાર તરફથી જ આર્થિક મદદ મળે છે.

આશાએ જણાવ્યું હતું કે, 144 વર્ષ બાદ આવતા આ મહાપર્વમાં આવવા માટે તેણે મહિનાઓથી તૈયારી કરી લીધી હતી. તે ગત વર્ષે સપ્ટેમ્બરમાં જ લંડનથી રાજકોટ આવી ગઈ હતી.

તેની શિબિરમાં દરરોજ 10 હજાર લોકો પ્રસાદ ગ્રહણ કરે છે. આશા આ ઉપરાંત સુરેન્દ્રનગરમાં 48 છોકરીઓને ભણાવી રહી છે. છેલ્લા પાંચ વર્ષથી તે ગુજરાતના વડીલોને સંગમ સ્નાન માટે પૈસા મોકલે છે.