સાવરકરની ટિપ્પણી મુદ્દે રાહુલ ગાંધીને રાહત : કોર્ટમાં હાજર થવામાં કાયમી મુકિત મળી

India | 19 February, 2025 | 05:10 PM

પૂણેની ખાસ કોર્ટે કહ્યું - આરોપી વિપક્ષી નેતા છે, કાયદો અને વ્યવસ્થાના મુદ્દાને લઈને કેસમાં કાયમી હાજરીથી મુકિત આપવામાં આવે છે

સાંજ સમાચાર

પૂણે તા.19
પુણેની એક ખાસ કોર્ટે હિન્દુત્વ વિચારક વિનાયક દામોદર સાવરકર વિરુદ્ધ તેમની કથિત વાંધાજનક ટિપ્પણીઓ પર દાખલ કરાયેલા માનહાનિના કેસમાં કોંગ્રેસના સાંસદ રાહુલ ગાંધીને મોટી રાહત આપી છે. હવે રાહુલ ગાંધીને આ મામલે કોર્ટ સમક્ષ વ્યક્તિગત રીતે હાજર રહેવાની જરૂર રહેશે નહીં. મંગળવારે કોર્ટે તેમને હાજર રહેવાથી કાયમી મુક્તિ આપી હતી.

માનહાનિ કેસમાં રાહુલ ગાંધીનું પ્રતિનિધિત્વ કરી રહેલા એડવોકેટ મિલિંદ પવારે ગયા મહિને કોર્ટ સમક્ષ અરજી દાખલ કરી હતી જેમાં કોંગ્રેસના નેતાને હાજર રહેવાથી કાયમી મુક્તિ મેળવવાની માંગ કરવામાં આવી હતી. આ કેસ સાવરકરના એક સંબંધી દ્વારા દાખલ કરવામાં આવ્યો હતો અને રાહુલ ગાંધીને આ કેસમાં પહેલાથી જ જામીન મળી ચૂક્યા છે.

એમપી/એમએલએ કોર્ટના જ્યુડિશિયલ મેજિસ્ટ્રેટ (ફર્સ્ટ ક્લાસ) અમોલ શિંદેએ તેમના આદેશમાં જણાવ્યું હતું કે આરોપી લોકસભામાં વિરોધ પક્ષના નેતા છે અને તેમણે ઘણી બેઠકોમાં હાજરી આપવી પડે છે. રાહુલ ગાંધીને ’ઝેડ-પ્લસ’ શ્રેણીની સુરક્ષા પૂરી પાડવામાં આવી છે.

આ બાબતને ધ્યાનમાં રાખીને, કોર્ટે પોતાના આદેશમાં કહ્યું કે તેમના દ્વારા (પુણેની મુલાકાત દરમિયાન) કરવામાં આવેલા ખર્ચ અને સુનાવણીમાં હાજરી આપવા સાથે સંકળાયેલા કાયદો અને વ્યવસ્થાના મુદ્દાને ધ્યાનમાં રાખીને, તેમને કેસમાં હાજર રહેવાથી કાયમી મુક્તિ આપવામાં આવે છે.

ગયા મહિને, સાવરકરના પૌત્રની ફરિયાદ પર દાખલ કરાયેલા કેસમાં વર્ચ્યુઅલી કોર્ટમાં હાજર થયા બાદ રાહુલ ગાંધીને જામીન આપવામાં આવ્યા હતા. આ ફરિયાદ માર્ચ 2023માં લંડનમાં ગાંધીજી દ્વારા આપવામાં આવેલા ભાષણ સાથે સંબંધિત છે. ગાંધીજીએ તેમના ભાષણમાં સ્વતંત્રતા સેનાની વિશે તેમના દ્વારા લખાયેલા એક પુસ્તકનો ઉલ્લેખ કરીને કેટલીક ટિપ્પણીઓ કરી હતી.