જુનાગઢનાં ચિત્તાખાના ચોકમાં કોંગ્રેસનાં વિજય સરઘસ ઉપર પથ્થરમારો: મહિલા પોલીસને ઈજા

સામે પક્ષે કોંગ્રેસનાં વિજેતા ઉમેદવાર સહિત ટોળા વિરૂધ્ધ હુલ્લડની ફરિયાદ: પોલીસે ધાડેધાડા ઉતારી પરિસ્થિતિને કાબુમાં લીધી: બંને પક્ષના ધમાલ કરનાર કાર્યકરોની અટકાયતનો દૌર શરૂ

♣આમ આદમી પાર્ટીના કાર્યકરોએ હુમલો કર્યાનો કોંગ્રેસ અગ્રણીનો આરોપ

જુનાગઢ તા.19
 જુનાગઢ મહાપાલિકાની ચૂંટણીમાં વોર્ડ નં.8માં કોંગ્રેસની પેનલ વિજેતા થતા, વિજય સરઘસ નીકળેલ, ચિત્તાખાના ચોકમાં આ સરઘસ ઉપર પથ્થરમારો થતા એક મહિલા કોન્સ.ને ઈજા પહોંચી હતી. ત્યાં પોલીસે મામલો થાળે પાડી બે શખ્સોની અટક કરી દસ શખ્સો સામે ગુનો નોંધી તપાસ હાથ ધરી છે. વોર્ડ નં.8માં કોંગ્રેસની પેનલ ચૂંટાઈ આવતા વિજય સરઘસ નીકળ્યું હતું.

ત્યારે પરાજીત આમ આદમી પાર્ટીના કાર્યકરોએ પથ્થરમારો કર્યો હતો. તેમ કોંગી અગ્રણી અશરફ થઈમે દાવો કર્યો છે. આ હિચકારા હુમલામાં ગર્વ.ટીમના મહિલા કોન્સ. મયુરીબેન ધ્રાંગાને ઈજા પહોંચતા હોસ્પિટલમાં ખસેડવામાં આવેલ છે.

વિજય સરઘસ ઉપર હુમલાને પગલે પોલીસે બે શખ્સોની અટકાયત કરી દસ શખ્સો સામે ગુનો નોંધી ઝડપી લેવા તજવીજ હાથ ધરી છે. આ બનાવથી નાસભાગ મચી હતી. પોલીસે પરિસ્થિતિને અંકુશમાં કરી હતી. આ બનાવથી શહેરમાં ચકચાર પ્રસરી ગઈ છે.

જુનાગઢના ચિત્તાખાના ચોકમાં વોર્ડ નં.8ના કોંગ્રેસના વિજય સરઘસ વેળાએ વિજેતા ઉમેદવારો તથા તેમના ટેકેદારોએ પરાજીત આમ આદમી પાર્ટીના કાર્યકરો સામે દેખાવો કરી હુલ્લડ કરી હાથાપાઈ કરી વિજેતા ઉમેદવાર અદ્રેમાન પંજાએ લાકડાનો ઘા કરી, મહિલા કોન્સ.ને ઈજા પહોંચાડી હતી. આ અંગે પોલીસે 23 શખ્સો સામે ફરીયાદ નોંધી દસ શખ્સોની અટકાયત કરી છે.

કોંગ્રેસ તથા આમ આદમી પાર્ટીના ઉમેદવારો તથા તેમના ટેકેદારો ચિત્તાખાના ચોકમાં વિજય સરઘસ વેળાએ એકઠા થઈ પોલીસની ફરજમાં રૂકાવટ કરી શાંતિ ડહોળવા હલ્લાબોલ સુત્રોચ્ચાર શરૂ કર્યો હતો. અને બન્ને પક્ષના કાર્યકરો વચ્ચે ઝપાઝપી કરી હુલ્લડ કયુર્ં હતું.

પોલીસે સમજાવટના પ્રયાસો કરવા છતાં ટોળું નિરંકુશ બન્યું હતું. અને ધમાલ મચાવી હતી. આ બનાવને પગલે પોલીસના ધાડા ઉતારી મામલો થાળે પાડયો હતો. આ અંગે પીએસઆઈ પાલુભાઈ કાનાભાઈ ગઢવીએ અદ્રેમાન પંજા, અરમાન તારીક શેખ, ઝહીર ઝાકીર શેખ, સાકીર કાદર શેક સહિત 21 શખ્સો સામે ગુનો નોંધ્યો હતો.

પોલીસે આ ટોળામાંથી આદમ હાલા, મોહમદ ઉર્ફે ડેની હુસેન હાલા, શરીફ ઉર્ફે દિલો હાલા સહિત દસ શખ્સોની ધરપકડ કરી નાસી છુટેલા અન્ય શખ્સોને ઝડપી લેવા એ ડીવીઝન પોલીસે કોમ્બીંગ હાથ ધયુર્ં છે. આ બનાવથી શહેરમાં ચકચાર ફરી વળી છે.