રાજુલાનાં ચાંચ બંદર ગામનાં યુવાન પર ત્રણ શખ્સોનો હુમલો

(વિપુલ હિરાણી)
ભાવનગર, તા.13
રાજુલા તાલુકાના ચાંચ બંદર ગામમાં રહેતો યુવાન નેસવડ ગામમાં આવેલ પેટ્રોલ પંપ ઉપર સ્કૂટરમાં પેટ્રોલ પુરાવવા ગયો ત્યારે પેટ્રોલ પુરવા બાબતે ત્રણ શખ્સોએ લોખંડના પાઇપ વડે હુમલો કરતા યુવાને પોલીસ ફરિયાદ નોંધાવી છે. 

આ બનાવ અંગે પ્રાપ્ત વિગત અનુસાર રાજુલા તાલુકાના ચાંચ બંદર ગામના વતની અને હાલ રમેશભાઈ જોળીયા રહે. માળીયા વાળાની વાડીએ રહેતા અને જેસીબીનું ડ્રાઇવિંગ કરતા યુવાન ભરતભાઈ પરબતભાઈ ગુજરીયા તેમના શેઠ રમેશભાઈની એક્સેસ ગાડી લઈને નેસવડ ગામ નજીક આવેલ ડુંડાસ ચોકડી પાસેના અભિષેક પેટ્રોલ પંપ પર પેટ્રોલ પુરાવવા માટે ગયા હતા જ્યાં પેટ્રોલ પુર્યા બાદ તેમની ગાડીમાં પેટ્રોલ આવ્યું ન હોવાનું જણાતા તેમણે પેટ્રોલ પૂરનાર વ્યક્તિને જાણ કરતા તેણે ફરીથી પેટ્રોલ પુરી આપ્યું હતું. 

તે દરમિયાન ત્યાં હાજર એક શખ્સે તેની સાથે માથાકૂટ કરતા તેઓ ત્યાંથી નીકળી ગયા હતા. ત્યારબાદ બે શખ્સ તેમની પાછળ  આવ્યા હતા અને ફરીથી પેટ્રોલ પંપ પર બોલાવ્યા હતા અને ત્યાં હાજર હરેશ મગનભાઈ બારૈયા, કેશુ મગનભાઈ બારૈયા અને નવલ મગનભાઈ બારૈયા (રહે. તમામ નેસવાડ તા.મહુવા) એ ગાળો આપી લોખંડના પાઈપ વડે વડે હુમલો કરી જાનથી મારી નાખવાની ધમકી આપી હતી. આ બનાવ અંગે ભરતભાઈ પરબતભાઈ ગુજરીયા એ ત્રણેય વિરુદ્ધ મહુવા પોલીસ મથકમાં ફરિયાદ નોંધાવી છે.

હુમલો
ભાવનગરના કાળિયાબીડ વિસ્તારમાં રહેતા યુવાને વ્યાજે લીધેલ રકમ ચૂકવી આપી હોવા છતાં વધુ રકમની માંગણી કરી ત્રણ શખ્સે હુમલો કરતા ઈજાગ્રસ્ત યુવાને પોલીસ ફરિયાદ નોંધાવી છે. 

આ બનાવ અંગે પ્રાપ્ત વિગત અનુસાર ભાવનગરના કાળિયાબીડ વિસ્તારમાં આવેલ કે.પી.ઈ.એસ. કોલેજની પાછળના ભાગે રહેતા યુવાન યુવરાજસિંહ રાજેન્દ્રસિંહ ગોહિલ એ ભાવનગરના સુભાષનગર વિસ્તારમાં રહેતા કૃણાલ ભટ્ટ પાસેથી રૂ.20,000/-  20 ટકાના વ્યાજે લીધા હતા અને ઓનલાઇન તેમજ રોકડ મળી કુલ રૂ.40,000/-  પરત આપી દીધા હોવા છતાં તેની પાસે વધુ રૂ. 20,000/- ની પઠાણી ઉઘરાણી કરતા હતા.

ગઈકાલે યુવરાજસિંહ ગોહિલ તેના મિત્ર સાથે સરદારનગર વિસ્તારમાં બેઠા હતા ત્યારે સંદીપ બાબરીયા એ ફોન કર્યા બાદ કૃણાલ ભટ્ટ, સંદીપ બાબરીયા અને વિશાલ ભરવાડ બાઈક ઉપર આવ્યા હતા અને રૂ.20,000/-  ની ઉઘરાણી કરી સંદીપ બાબરીયા અને વિશાલ ભરવાડે હાથમાં પહેરેલ કડા વડે માર મારી ઇજા પહોંચાડી હતી અને ધમકી આપી જતા રહ્યા હતા.

 આ બનાવ અંગે યુવરાજસિંહ રાજેન્દ્રસિંહ ગોહિલે કૃણાલ ભટ્ટ, સંદીપ બાબરીયા અને વિશાલ ભરવાડ વિરુદ્ધ ઘોઘારોડ પોલીસ મથકમાં ફરિયાદ નોંધાવી છે.