તમે કોઇ મોટા વકિલનું નામ લઇને ધાર્યુ કરાવી શકો નહીં : સર્વોચ્ચ અદાલત

India | 19 February, 2025 | 05:34 PM

હરીશ સાલ્વેનું નામ લઇ સુનાવણી સ્થગિત કરવા માંગણી કરનાર ધારાશાસ્ત્રી પર સુપ્રિમનો ગુસ્સો વરસ્યો

સાંજ સમાચાર

નવી દિલ્હી, તા. 19
સુપ્રિમ કોટમાં એક ધારાશાસ્ત્રીએ કેસની સુનાવણી સ્થગિત કરવાની માંગણી માટે આગામી દિવસોમાં એક મોટા અને સિનિયર ધારાશાસ્ત્રી આ કેસમાં રજૂ થનાર છે. તેવી દલીલ કરતા જ સર્વોચ્ચ અદાલતએ તેની આકરી ટીકા કરી હતી. અને કહ્યું કે તમે કોઇ મોટા વકીલનું નામ લઇને જો સુનાવણી સ્થગિત કરવા માંગતા હો તો અમે તે ચાલવા દેશું નહીં તમારૂ આ પ્રકારનું વિચારવું પણ ખોટુ હશે.

આજે સુનાવણી દરમ્યાન ન્યાયમૂર્તિ અભય એસ. ઓકાની ખંડપીઠ સમક્ષ એક વ્યાવસાયિક વિવાદમાં સુનાવણી ચાલુ હતી તે દરમ્યાન રજૂ થયેલા ધારાશાસ્ત્રીએ આ કેસની સુનાવણી ચાર સપ્તાહ સ્થગિત કરવાની માંગણી કરી અને એવું કહ્યું કે વરિષ્ઠ વકિલ હરીશ સાલ્વે હવે આ કેસમાં રજૂ થનાર છે તેઓ હાલ વિદેશમાં છે. અને ભારત પરત ફરશે પછી સુપ્રિમ કોર્ટમાં રજૂ થશે. આ માહિતી સાંભળીને ખંડપીઠમાં આક્રોશ વ્યાપી ગયો અને કહ્યું કે તમે કોઇ મોટા વકીલનું નામ લ્યો અને અમે સુનાવણી સ્થગિત કરવાની માંગણી સ્વીકારીએ તે અમે સ્વીકાર કરશું નહીં.

હરીશ સાલ્વેએ દેશના ટોચના ધારાશાસ્ત્રી તરીકે નામના ધરાવે છે પણ તે મોટા ભાગે વિદેશમાં રહે છે અને આ કેસમાં તેઓ સુનાવણી કરવા ભારત આવવા સંમત થયા હતા પણ તેમનું શેડયુલ ચાર સપ્તાહનું પછીનું હોવાનું સુનાવણી મોકુફ રાખવા માંગણી થઇ હતી.