રેલવેનું પ્રાણવાયુ વહન : હાપા - મુંદ્રાથી અત્યાર સુધીમાં 18 ટ્રેનો મારફત 1771.07 ટન ઓક્સિજન દેશના જુદા - જુદા રાજ્યોમાં મોકલાયો

11 May 2021 09:06 PM
Rajkot Gujarat
  • રેલવેનું પ્રાણવાયુ વહન : હાપા - મુંદ્રાથી અત્યાર સુધીમાં 18 ટ્રેનો મારફત 1771.07 ટન ઓક્સિજન દેશના જુદા - જુદા રાજ્યોમાં મોકલાયો

મહારાષ્ટ્ર, હરિયાણા, રાજસ્થાન, ઉત્તર પ્રદેશ અને દિલ્હીવાસીઓના પ્રાણ બચાવવા પશ્ચિમ રેલવે સતત પ્રયત્નશીલ : પ્રાણવાયુ પહોંચાડી ટ્રેનોના પાયલોટએ કહ્યું - રાષ્ટ્રીય હિતમાં ફાળો આપવો અમારા માટે ગર્વની વાત

રાજકોટઃ
દેશમાં કોરોના મહામારીના કહેર વચ્ચે જ્યારે ઓક્સિજનની અછત સર્જાઈ છે ત્યારે પશ્ચિમ રેલવે વિભાગ યુધ્ધના ધોરણે દેશના જુદા જુદા રાજ્યોમાં ઓક્સિજન પહોંચાડવાની કામગીરીમાં લાગી ગયું છે. હાપા - મુંદ્રાથી અત્યાર સુધીમાં 18 ટ્રેનો મારફત 1771.07 ટન ઓક્સિજન દેશના જુદા - જુદા રાજ્યોમાં મોકલાયો છે.

ગુજરાતમાં પશ્ચિમ રેલ્વેની ઓક્સિજન એક્સપ્રેસ ટ્રેનો ચલાવતા LOCO પાયલોટે પોતાના અનુભવો શેર કરતા કહ્યું કે, રાષ્ટ્રીય હિતમાં ફાળો આપવો તે ખૂબ ગર્વની વાત છે. દેશભરના વિવિધ રાજ્યોમાં ઓક્સિજન એક્સપ્રેસ ટ્રેનો ચલાવવાના ભારતીય રેલ્વેના પ્રયત્નોને વેગ આપતા પશ્ચિમ રેલ્વે દ્વારા કોવિડ વિરુદ્ધ સંયુક્ત યુદ્ધને મજબૂત બનાવવા અને કોવિડ દર્દીઓ અને તેમના પરિવારોને રાહત આપવા માટે લિક્વિડ મેડિકલ ઓક્સિજનના પરિવહન માટે સતત એક્સપ્રેસ ટ્રેનો દોડાવવામાં આવી રહી છે. પશ્ચિમ રેલ્વેના ગુજરાતના હાપા અને મુંદ્રા પોર્ટથી ઓક્સિજન એક્સપ્રેસ ટ્રેન ચલાવતા લોકો પાઇલટે પોતાના અનુભવો શેર કર્યા હતા.

રાજકોટ ડિવિઝનના લોકો પાયલટ અરૂણકુમાર પાંડેએ જણાવ્યું હતું કે 4 મે, 2021 ના ​​રોજ તેમણે હાપાથી સુરેન્દ્રનગર ની વચ્ચે ઓક્સિજન એક્સપ્રેસ ટ્રેન ચલાવી હતી. આ સમય દરમિયાન તેમને આ સેક્શનમાં દરેક જગ્યાએ ગ્રીન સિગ્નલ મળ્યા જેથી સલામતીનાં પગલાંની ખાતરી કરતા લગભગ 53-56 કિમી પ્રતિ કલાકની સરેરાશ ઝડપે અવિરત માર્ગ પર ટ્રેન ચલાવી શકે. તેમણે કહ્યું, 'જ્યારે હાલના સંજોગોમાં કોવિડ -19 ને કારણે દેશના વિવિધ રાજ્યોમાં ઓક્સિજનનો અભાવ છે ત્યારે હું એવા સમયે ઓક્સિજન પહોંચાડવા માટે ભારતીય રેલ્વેના આ મિશનનો ભાગ બનીને ખૂબ જ ગૌરવ અનુભવું છું'. મેં જોયું કે રેલ્વે કામગીરી સાથે સંકળાયેલા તમામ રેલ્વે કર્મચારીઓ સંપૂર્ણ તકેદારી અને સમર્પણ સાથે કાર્યરત છે.

પશ્ચિમ રેલવે અમદાવાદના જનસંપર્ક અધિકારી પ્રદીપ શર્માની યાદીમાં જણાવાયું છે કે, ભારતીય રેલ્વે દેશભરના વિવિધ રાજ્યોને મિશન મોડમાં લિક્વિડ મેડિકલ ઓક્સિજન પ્રદાન કરવાની પ્રક્રિયા ચાલુ રાખશે. આ જ ક્રમમાં પશ્ચિમ રેલવે દ્વારા અત્યાર સુધીમાં હાપા અને મુંદ્રા પોર્ટથી મહારાષ્ટ્ર, હરિયાણા, રાજસ્થાન, ઉત્તર પ્રદેશ અને દિલ્હી માટે ઓક્સિજન ટેન્કરો દ્વારા કુલ 18 ટ્રેનોમાં લગભગ 1771.07 ટન લિક્વિડ મેડિકલ ઓક્સિજન પહોંચાડવામાં આવ્યો છે.

● સમયસર ઓક્સિજન પહોંચાડવા અમે આ ટ્રેનને રાજધાની ટ્રેનની ગતિએ દોડાવી હતી : પાયલટ સર્વેશ શર્મા

અમદાવાદ ડિવિઝનના ગાંધીધામમાં પોસ્ટેડ લોકો પાયલટ સર્વેશ શર્મા જણાવે છે કે, મારા 21 વર્ષના સેવાકાળની યાદગાર યાત્રા રહી જ્યારે મુન્દ્રા પોર્ટ કાર્ગો કોમ્પ્લેક્સથી પાટલી (હરિયાણા) ઓક્સિજન એક્સપ્રેસ ચલાવવા માટે મને ડ્યુટી કોલ મળ્યો. તે સમયે, પરિવાર સાથે હતો અને ઘરે પણ પત્નીએ બાળકોમાં આ ફરજ માટે ઉત્સાહ દર્શાવ્યો કારણ કે, અખબારો ટીવી પર જોઈ રહ્યા હતા કે આપણા ત્યાં ઓક્સિજનની અછત છે અને ભારતીય રેલ્વે આ પ્રાણવાયુને સતત દિલ્હી, હરિયાણા અને ઉત્તરપ્રદેશમાં સપ્લાય કરી રહી છે. હું પણ તે સફરનું માધ્યમ બની રહ્યો હતો. તેમણે કહ્યું કે 84 ટન લિક્વિડ ઓક્સિજન સિલિન્ડરના 6 કન્ટેનર સહિતની આખી ટ્રેન સાથે પાલનપુરની યાત્રામાં કોઈ અડચણ ન હતી આવી. અમે આ ટ્રેનને રાજધાની ટ્રેનની ગતિએ દોડાવી હતી. અમને દરેક સ્ટેશન પર ગ્રીન સિગ્નલ મળ્યું અને અમે 372 કિ.મી.નું આ અંતર 06:45 કલાકમાં પાર કર્યું જે ડબલ સ્ટેક કન્ટેનર રેક્સ માટે મહત્તમ હતું અને મે પણ સૌથી લાંબી ટ્રેન ચલાવવાનો લ્હાવો ગૌરવ સાથે લીધો.


Related News

Loading...
Advertisement