સુરેન્દ્રનગરના ખેડુતની પુત્રી પોલીસ ઇન્સ્પેકટર બની

13 January 2022 02:05 PM
Surendaranagar
  • સુરેન્દ્રનગરના ખેડુતની પુત્રી પોલીસ ઇન્સ્પેકટર બની

મહિલાઓ અને બાળકો વિરૂધ્ધ થતા ગુના અટકાવવા ઇચ્છે છે : કુંદનબેન ગઢવી

(ફારૂક ચૌહાણ)
વઢવાણ, તા. 13
મૂળ સુરેન્દ્રનગર અને છેલ્લા થોડા વર્ષોથી કચ્છમાં નોકરી કરતી યુવતી પોલીસ ઇન્સ્પેક્ટર બની છે. ખેતી સાથે જોડાયેલ પરિવારની પુત્રી પોલીસ ઇન્સ્પેક્ટર બની મહિલાઓ અને બાળકો વિરૂદ્ધ થતાં ગુના અટકાવવા ઈચ્છા ધરાવે છે. દેશનો યુવાન ધારે તે શકે છે તે સાબિત કર્યું છે સુરેન્દ્રનગરના ધ્રાંગધ્રાના વતની અને છેલ્લા બે વર્ષથી કચ્છમાં આઇ.સી.ડી.એસ.શાખામાં મુખ્ય સેવિકા તરીકે ફરજ બજાવતા કુંદનબેન ગઢવીએ. કુંદનબેન સરકારના આઇ.સી.ડી.એસ. શાખામાં જોડાયા બાદ કચ્છમાં પોસ્ટિંગ પર આવ્યા હતા. બાળપણથી પોલીસમાં જોડાવાનો સ્વપ્ન સાકાર કરવા તનતોડ મહેનત કરી અને ગુજરાત જાહેર સેવા આયોગની વર્ગ 2ની પરીક્ષા પાસ કરી પોલીસ ઇન્સ્પેકટર બન્યા છે.

ખાસ વાતચીતમાં કુંદનબેને જણાવ્યું હતું કે બાળપણથી જ પોલીસ વિભાગમાં જોડાઈ દેશની સેવા કરવાનું સ્વપ્ન હતું. "બાળપણમાં જ્યારે પોલીસની પરેડ થતી હોય ત્યારે હંમેશ એક ઈચ્છા જાગતી કે જો હું પણ પોલીસમાં હોઉં તો એક સારી લીડર બની વિભાગને ગાઈડ કરી શકું.કુંદનબેનનું પરિવાર અનેક વર્ષોથી ખેતી સાથે સંકળાયેલો છે. પોતાના વતન ધ્રાંગધ્રાના પીપળી ગામે તેમનું પરિવાર ખેતીવાડી સંભાળે છે. પોતાનું ગ્રેજ્યુએશન પૂર્ણ કર્યા બાદ કુંદનબેને પોલીસ ઇન્સ્પેકટરની પરીક્ષા માટે તૈયારી શરૂ કરી હતી. 2018માં પરીક્ષા આપ્યા બાદ ઇન્ટરવ્યૂ રાઉન્ડ સુધી પહોંચ્યા હતા એટલા બીજી વખત ભરતી આવતા ફરી અથાક મહેનતથી તૈયારી કરી ઇન્ટરવ્યૂ પણ પાસ કર્યું હતું.

કુંદનબેને જણાવ્યું હતું કે ગાંધીધામમાં બે વર્ષ આઇ.સી.ડી.એસ. શાખામાં ફરજ બજાવતા ત્યારે બાજુમાં જ પોલીસ અધિક્ષકની કચેરીમાં પોલીસ કર્મીઓને પોતાનું કામ કરતા જોઈ આકર્ષાતા હતા. "આઈ.સી.ડી.એસ. શાખામાં ફરજ બજાવતા બાદ હવે પોલીસ વિભાગમાં હું મહિલાઓ અને બાળકો માટે ખૂબ સારી કામગીરી કરી શકીશ. આપણા દેશમાં થતાં જુવેનાઇલ ક્રાઈમ અને બાળકો પ્રત્યે થતાં ક્રાઇમ હું અટકાવી શકું તે તરફ પ્રયાસો કરીશ," તેવું કુંદનબેને કહ્યું હતું.


Loading...
Advertisement
Advertisement