રાજકોટના કોર્પોરેટરના ભાઈ-ભત્રીજાઓએ તાલાલામાં લખણ ઝળકાવ્યા: બાઈકચાલકની કરી બેફામ ધોલાઈ

28 June 2022 05:50 PM
Rajkot
  • રાજકોટના કોર્પોરેટરના ભાઈ-ભત્રીજાઓએ તાલાલામાં લખણ ઝળકાવ્યા: બાઈકચાલકની કરી બેફામ ધોલાઈ

કાર સરખી ચલાવવાનું કહેતાં જ લાકડીથી તૂટી પડ્યા: બાઈકચાલકનો અઢી તોલાનો ચેઈન ગાયબ: ડખ્ખો શાંત કરાવવા વચ્ચે પડેલા ગામલોકોને પણ માર્યો માર: તાલાલા પોલીસે ગુનો નોંધી ચાર શખ્સોની શરૂ કરેલી શોધખોળ

રાજકોટ, તા.28 : મંત્રી, ધારાસભ્ય, કોર્પોરેટર, પોલીસને કદાચ જેટલો ‘પાવર’ નહીં હોય તેના કરતાં બમણો કે ચાર ગણો પાવર તેના સગા-સંબંધીને હોય તેવું એક નહીં બલ્કે અનેકવખત પ્રકાશમાં આવી ચૂક્યું છે ત્યારે આવી જ ઘટના ફરી એક વખત બનવા પામતાં ચકચાર મચી જવા પામી છે. શહેરના વોર્ડ નં.15ના કોંગ્રેસી કોર્પોરેટર મકબુલ દાઉદાણીના ભાઈ અને બે ભત્રીજા સહિત ચાર લોકોએ તાલાલામાં લખણ ઝળકાવી બાઈકચાલકને બેફામ માર માર્યો હોવાની ફરિયાદ નોંધતાં પોલીસે ચારેય સામે ગુનો નોંધી ધરપકડ કરવા તજવીજ શરૂ કરી છે.

આ અંગે પોલીસ ચોપડે નોંધાયેલી વિગતો પ્રમાણે તાલાલાના ભોજદે ગામમાં રહેતાં હમીર ઉકાભાઈ નંદાણીયા (ઉ.વ.40) નામનો આહિર યુવાન ગત તા.26ના રાત્રે નવેક વાગ્યે મોટર સાઈકલ લઈને વાડીએથી ઘેર જતો હતો ત્યારે સવા નવેક વાગ્યા આસપાસ રાધે ફાર્મ અને ખોડલ ફાર્મની વચ્ચે પહોંચ્યો ત્યારે ભોજદે ગામ તરફથી સફેદ કલરની એક બલેનો તેમજ તેની પાછળ એક સ્કોર્પિયો કાર આવી રહી હતી. રસ્તો સાંકળો હોવાને કારણે હમીરે પોતાનો મોટર સાઈકલ રોડની સાઈડમાં ઉતારી કારને રસ્તો આપવાનો પ્રયાસ કરતાં તે મોટર સાઈકલ પરથી નીચે પડી ગયો હતો.

આ વેળાએ બલેનો કારમાંથી હમીરને કોઈએ ગાળો આપ્યા બાદ થોડે જ દૂર જઈને બન્ને ગાડીઓ ઉભી રહી ગઈ હતી. આ પછી હમીર મોટર સાઈકલ ઉભું કરી કાર પાસે ગયો કે તુરંત જ કારમાંથી એક શખ્સ લાકડી લઈને નીચે ઉતર્યો અને ‘શું છે તારે’ તેમ કહી હમીર પાસે ધસી આવ્યો હતો. આ પછી તે કારચાલકને ‘કાર આ રીતે ન ચલાવાય’ તેવું કહેતાં જ તેણે ઉશ્કેરાઈ જઈને ગાળો આપીને લાકડી સાથે તૂટી પડ્યો હતો. આ વેળાએ ગામના બે યુવાન ભરત ભીખાભાઈ તેમજ તેનો નાનો પુત્ર ત્યાં આવી પહોંચ્યા હતા અને શું કામ માથાકૂટ થઈ રહી છે

તેવું પૂછતાં સ્કોર્પિયો કારમાં બેઠેલા ત્રણ લોકો પણ લાકડી લઈને દોડી આવ્યા હતા અને ગાળો આપી હમીર તેમજ ડખ્ખામાં વચ્ચે પડેલાં લોકો ઉપર તૂટી પડ્યા હતા. હમીર સહિતના લોકોને માર માર્યા બાદ ‘અહીંયાથી જતાં રહો નહીંતર જીવતા નહીં જવા દઈએ’ તેમ કહી જાનથી મારી નાખવાની ધમકી પણ આપી હતી. ઘટના અંગે હમીરે તેના પરિવારજનોને ફોન કરવાનું શરૂ કરતાં જ તમામ કાર લઈને નાસી છૂટ્યા હતા. મારામારી દરમિયાન હમીરનો અઢી તોલાનો ચેઈન ગાયબ થઈ ગયાની પણ ફરિયાદ નોંધાઈ છે.

રાજકોટના કોર્પોરેટરના ભાઈઓ-ભત્રીજાઓને ફરિયાદી હમીર ઓળખતો નહોતો પરંતુ માર મારનાર શખ્સોની શોધખોળ કરતાં સ્કોર્પિયો કારના નંબર જાણવા મળી ગયા હતા. આ પછી ફરિયાદી હમીરે જીજે-03-એફકે-8607 નંબરની સ્કોર્પિયો કારમાં આવેલા સદામ દાઉદાણી, અકરમ દાઉદાણી, નવાબ દાઉદાણી તેમજ અર્જુન ભટ્ટનું નામ ખુલતાં તેમની સામે ફરિયાદ નોંધાવી હતી. મારામારીને કારણે હમીરને જમણી આંખ ઉપર ઈજા થતાં તેને હોસ્પિટલે દાખલ કરવો પડ્યો હતો. તાલાલા પોલીસે ચારેય હુમલાખોર સામે ફરિયાદ નોંધી તેમની ધરપકડ કરવા ચક્રો ગતિમાન કર્યા છે.

કોર્પોરેટરે તાજેતરમાં જ પોતાના બન્ને ભાઈઓને મિલકતમાંથી કરી દીધા’તા બેદખલ
કોંગ્રેસી કોર્પોરેટર મકબુલ દાઉદાણી અને તેના ભાઈ મુખ્તાર દાઉદાણી તાજેતરમાં જ પોતાના બન્ને ભાઈઓ કહ્યામાં ન હોવાથી છેડો ફાડી નાખીને મિલકતમાંથી બેદખલ કરી દીધા હતા. આ અંગેની જાહેર અપીલ પણ દાઉદાણી બંધુએ અખબારો મારફતે કરી હોવાનું જાણવા મળી રહ્યું છે.


Related News

Loading...
Advertisement
Advertisement