‘KGF’ માં અંધ વ્યકિતનું પાત્ર ભજવનાર કૃષ્ણા જી.રાવનું બીમારીથી નિધન

08 December 2022 12:12 PM
Entertainment India
  • ‘KGF’ માં અંધ વ્યકિતનું પાત્ર ભજવનાર કૃષ્ણા જી.રાવનું બીમારીથી નિધન

બેંગ્લુરુની હોસ્પિટલમાં સારવાર દરમિયાન અંતિમ શ્વાસ લીધા

બેંગ્લુરુ,તા.8
ફિલ્મ કેજીએફમાં અંધ વ્યક્તિનું પાત્ર ભજવી રોકીની અંદર માણસાઈ જગાડનારા એક્ટર કૃષ્ણા જી રાવનું બુધવારે અવસાન થયું હતું. તેઓ ઘણા સમયથી બીમાર હોવાથી બેંગ્લુરની એક હોસ્પિટલમાં દાખલ કરવામાં આવ્યા હતા અને ત્યાં જ તેમણે અંતિમ શ્વાસ લીધા હતા. સોશિયલ મીડિયા પર ફેન્સ શોક વ્યક્ત કરી રહ્યા છે.

કેજીએફ ફેમ એક્ટર કૃષ્ણા જી રાવ જેમની છેલ્લા ઘણા દિવસથી તબિયત ખરાબ હતી, તેઓ આ દુનિયામાં રહ્યા નથી. બુધવારે તેઓ જીવન સામેની જંગ હારી ગયા હતા અને અંતિમ શ્વાસ લીધા હતા. તેમને ઉંમર સંબંધિત સમસ્યા હોવાના કારણે બેંગ્લુરુની એક ખાનગી હોસ્પિટલમાં દાખલ કરવામાં આવ્યા હતા. તેમના નિધનથી કન્નડ ફિલ્મ ઈન્ડસ્ટ્રીમાં શોકની લહેર ફરી વળી રહી છે.

તેઓ જાણીતા કલાકાર હતા અને ઘણા વર્ષોથી સાઉથ ઈન્ડસ્ટ્રી સાથે જોડાયેલા હતા. 70 વર્ષના કૃષ્ણા જી રાવે કેજીએફમાં અંધ વૃદ્ધ વ્યક્તિનું પાત્ર ભજવ્યું હતું અને પોતાના ડાયલોગથી લોકોના દિલ જીતી લીધા હતા. આશરે 30 વર્ષ બાદ તેમણે આ ફિલ્મ થકી એક્ટિંગમાં કમબેક કર્યું હતું.

કૃષ્ણા જી રાવના ફેન્સ સોશિયલ મીડિયા પર તેમના નિધન પર શોક વ્યક્ત કરી રહ્યા છે અને પરિવારને સાંત્વના પાઠવી રહ્યા છે. તેમણે તેમના અત્યારસુધીના કરિયરમાં ઢગલો ફિલ્મમાં નાના-નાના રોલ કર્યા હતા, આટલું જ નહીં કેટલીક ફિલ્મોમાં આસિસ્ટન્ટ ડિરેક્ટર તરીકે પણ ફાળો આપ્યો હતો. તેઓ દિવંગત એક્ટર શંકર નાગ સાથે પણ કામ કરી ચૂક્યા હતા. જો કે, કેજીએફ ફિલ્મથી તેમને વધારે પોપ્યુલારિટી મળી હતી.

બોક્સઓફિસ પર કેજીએફની જોરદાર સફળતા બાદ, તેમને કોમેડી ફિલ્મ નાનો નારાયણપ્પામાં લીડ એક્ટરનું પાત્ર ભજવવા મળ્યું હતું. આ ફિલ્મ તેલુગુમાં પણ બનાવવામાં આવી હતી, તેના રીલિઝ થવાની રાહ જોવામાં આવી રહી છે, જેમાં તેઓ નારાયણપ્પાના પાત્રમાં જોવા મળશે.

કેજીએફમાં રોલ કેવી રીતે મળ્યો તે અંગે મીડિયા સાથે વાતચીત કરતાં કૃષ્ણા જી રાવે જણાવ્યું હતું કે, તેમણે ઓડિશન આપ્યું હતું અને પ્રોડક્શન હાઉસ તેમની એક્ટિંગ સ્કિલથી પ્રભાવિત થયું હતું. ત્યારબાદ તેમને ટીમે ઓફર આવી હતી. ફિલ્મમાં તેઓ તે વ્યક્તિના રોલમાં હતા જેમને જોયા બાદ રોકીની અંદર માનવતા જાગી ઉઠી હતી.


Related News

Advertisement
Advertisement
Advertisement