દ્વારકાના સમુદ્ર તટ પરથી 44.85 લાખનો બિનવારસી ચરસનો જથ્થો ઝડપાયો

Crime | Jamnagar | 16 April, 2024 | 11:54 AM

ડ્રગ્સ બાદ 897 ગ્રામ ચરસ ભરેલું બોક્સ પેટ્રોલીંગ દરમિયાન પોલીસને મળી આવતા ખળભળાટ: અજાણ્યા શખ્સ સામે ગુનો દાખલ: સપ્લાયરની શોધખોળ

સાંજ સમાચાર

જામ ખંભાળિયા, તા.16
દેવભૂમિ દ્વારકાના દરિયા મારફતે હેરાફેરી થતા અગાઉ ઝડપાયેલા તોતિંગ ડ્રગ્સ બાદ પોલીસને દરિયાકાંઠા વિસ્તારમાંથી રૂપિયા 44.85 લાખની કિંમતનો ચરસનો જથ્થો મળી આવ્યો છે. જો કે આ માદક પદાર્થ મંગાવનારા તથા સપ્લાયરો પોલીસને ન મળી આવતા આ અંગે એસ.ઓ.જી. પોલીસે ધોરણસર ફરિયાદ નોંધાવી છે.

આ સમગ્ર પ્રકરણ અંગે પોલીસ સૂત્રો દ્વારા જાણવા મળતી વિગત મુજબ દેવભૂમિ દ્વારકા જિલ્લા સ્પેશિયલ ઓપરેશન ગ્રુપ (એસ.ઓ.જી.) દ્વારા ગતરાત્રિના હાથ ધરવામાં આવેલા પેટ્રોલિંગ દરમિયાન દ્વારકા વિસ્તારમાં આવેલા શાંતિનગર ખાતેની એક હોટલ નજીકના બીચની સામેના દરિયાકાંઠા નજીક પહોંચતા રાત્રિના આશરે 2 વાગ્યાના સમયે પોલીસને એક પ્લાસ્ટિકનું પારદર્શક બોક્સ સાંપળ્યું હતું. આથી પોલીસે આ બોક્સની તપાસ કરતા તેમાં રહેલો પદાર્થ ચરસ હોવાનું ખુલવા પામ્યું હતું.

એસ.ઓ.જી.ના ઇન્ચાર્જ પી.આઈ. પી.સી. સીંગરખીયા તથા તેમની ટીમ દ્વારા કરવામાં આવેલી આ કામગીરીમાં આ પ્લાસ્ટિકના પારદર્શક બોક્સમાં રહેલું 897 ગ્રામ ચરસ પોલીસે કબજે લીધું છે. આ ચરસની કિંમત 44,85,000 ગણવામાં આવી છે. જો કે આ સ્થળે પોલીસને કોઈ આરોપી મળી આવ્યો ન હતો.

આ અંગેની પ્રાથમિક તપાસમાં કોઈ શખ્સ દ્વારા આ ચરસનો જથ્થો મંગાવી, અને પોલીસના ચેકિંગ દરમિયાન હેરાફેરી કરતા પકડાઈ જવાના બીકે ચરસનો આ જથ્થો દરિયામાં અથવા દરિયા કાંઠે બિનવારસુ હાલતમાં છોડી દેવામાં આવ્યો હતો.

આમ, આશરે રૂપિયા 45 લાખ જેટલી કિંમતનો 897 ગ્રામ ચરસનો જથ્થો પોલીસે કબજે લઈ અને આ પ્રકરણમાં સંડોવાયેલા શખ્સ સામે એસ.ઓ.જી.ના ઈન્ચાર્જ પી.આઈ. પી.સી. સીંગરખીયાએ દ્વારકા પોલીસ મથકમાં એનડીપીએસ એક્ટ હેઠળ ધોરણસર ફરિયાદ નોંધાવી છે. આ સમગ્ર પ્રકરણ અંગે દ્વારકાના ડીવાયએસપી સાગર રાઠોડના માર્ગદર્શન હેઠળ આગળની તપાસ દ્વારકાના પી.આઈ. ટી.સી. પટેલ દ્વારા હાથ ધરવામાં આવી છે.

આ તમામ રેઈડ કામગીરી દરમિયાન પી.આઈ. સીંગરખીયા સાથે જગદીશભાઈ કરમુર, અશોકભાઈ સવાણી, સ્વરૂપસિંહ કેસરિયા, કૃષ્ણરાજસીંહ જાડેજા ઉપરાંત દ્વારકાના પી.આઈ. તુષાર પટેલ પણ જોડાયા હતા. આ સમગ્ર પ્રકરણ અંગે પોલીસ દ્વારા સપ્લાયરોની તપાસ સંદર્ભે વિવિધ દિશાઓમાં કામગીરી હાથ ધરવામાં આવી છે. (તસ્વીર : કુંજન રાડીયા)