લિવ-ઈન પાર્ટનર પર દુષ્કર્મના પરણિત આરોપીને કોર્ટે નિર્દોષ છોડ્યો

India | 09 May, 2024 | 12:03 PM

♦ ફરિયાદી યુવતીએ જ યુવક સાથે કરાર કર્યો હતો કે તે એક સપ્તાહ પત્ની પાસે અને એક સપ્તાહ તેની પાસે રહેશે

સાંજ સમાચાર

♦ જો કે મહિલાની ફરિયાદ પરથી પુરુષ 200 દિવસ જેલમાં રહ્યો હતો

નવી દિલ્હી : મધ્યપ્રદેશના ઈન્દોરની જિલ્લા અદાલતે 34 વર્ષીય પુરુષને તેની લિવ- ઇન પાર્ટનર પર દુષ્કર્મના આરોપમાંથી નિર્દોષ જાહેર કર્યો છે. યુવતીએ પુરુષ પર દુષ્કર્મ ઉપરાંત તેના પર ગર્ભપાત માટે દબાણ કરવાનો તથા જાનથી મારી નાખવાની ધમકી આપવાનો આરોપ લગાવ્યો હતો. કોર્ટે આપેલા નિર્ણયમાં ઉલ્લેખ કર્યો હતો કે બંને વચ્ચે સમજૂતી થઈ હતી.

યુવતીએ આરોપી સાથે કરાર કર્યો હતો કે તે સાત દિવસ તેની સાથે અને પછીના સાત દિવસ તેની પત્ની સાથે રહેશે. યુવતીની ફરિયાદ પર, ભંવરકુઆં પોલીસે 27 જુલાઈ 2021ના રોજ લિવ-ઈન પાર્ટનર પુરુષ વિરુદ્ધ કેસ નોંધ્યો હતો. 15 ઓગસ્ટ 2021ના રોજ તેની ધરપકડ કરવામાં આવી હતી. તે 200 દિવસ જેલમાં રહ્યો અને પછી 5 માર્ચ 2022ના રોજ જામીન પર બહાર આવ્યો હતો.

વધારાના સેશન્સ જજ જયદીપ સિંહે તથ્યો અને પુરાવા જોયા બાદ તેને આરોપમુક્ત જાહેર કર્યો હતો. પોતાના નિર્ણયમાં, કોર્ટે અવલોકન કર્યું હતું કે યુવતીએ 15 જૂન, 2021 ના રોજ એક કરાર કર્યો હતો, જેમાં લખ્યું હતું કે આરોપી પરિણીત છે અને તે તેની અને તેની પત્ની સાથે 7 દિવસ રીતે રહેશે. કરારમાં એમ પણ કહેવામાં આવ્યું છે કે બંને છેલ્લા બે વર્ષથી રિલેશનશિપમાં હતા.

જજે કહ્યું કે સમજૂતીથી સ્પષ્ટ થાય છે કે બંને લિવ-ઈન રિલેશનશિપમાં હતા. તેમની વચ્ચે પરસ્પર સંમતિથી શારીરિક સંબંધો બંધાયા હતા. તે વ્યક્તિ પહેલેથી જ પરિણીત હોવાથી યુવતી સાથે લગ્ન કરવાની સ્થિતિમાં નહોતો. આરોપીને નિર્દોષ જાહેર કરતી વખતે કોર્ટે કહ્યું કે, આ સંજોગોમાં આ વ્યક્તિને બળાત્કાર અને બળજબરીથી ગર્ભપાત માટે દોષિત ઠેરવી શકાય નહીં. જ્યાં સુધી જાનથી મારી નાખવાની ધમકીઓનો સંબંધ છે, આ અંગે પૂરતા પુરાવા નથી.