T20 વર્લ્ડ કપમાંથી પાકિસ્તાન બહાર ફેંકાયું : વરસાદે આશા પર પાણી ફેરવ્યું

વરસાદના કારણે અમેરિકા - આયર્લેન્ડ વચ્ચેનો મેચ ધોવાઇ જતા પાક.નું સ્વપ્ન રોળાયું

T20 વર્લ્ડ કપમાંથી પાકિસ્તાન બહાર ફેંકાયું : વરસાદે આશા પર પાણી ફેરવ્યું

World, Sports | 15 June, 2024 | 10:07 AM

પાંચ પોઇન્ટ સાથે અમેરિકાની સુપર-8માં એન્ટ્રી : ભારત અગાઉ જ સ્થાન મેળવી ચૂકયું છે

સાંજ સમાચાર

ટી-20 વર્લ્ડ કપ 2024ની 30મી મેચ વરસાદને કારણે ધોવાઈ ગઈ. આ મેચ અમેરિકા અને આયર્લેન્ડ વચ્ચે ફ્લોરિડાના સેન્ટ્રલ બ્રોવર્ડ રિજનલ પાર્ક સ્ટેડિયમ ટર્ફ ગ્રાઉન્ડ પર રમાવાની હતી. હવે બંને ટીમોને 1-1 પોઈન્ટ આપવામાં આવ્યા છે.

આ સાથે જ યજમાન અમેરિકાની ટીમ સુપર-8માં પહોંચી ગઈ છે. બીજી તરફ પાકિસ્તાનનું સુપર-8માં પહોંચવાનું સપનું ચકનાચૂર થઈ ગયું છે. જો પાકિસ્તાને સુપર-8માં સ્થાન મેળવવું હોય તો અમેરિકા માટે આજની મેચ હારવી જરૂરી હતી.

ફ્લોરિડામાં સતત વરસાદથી પિચ ભીની હોવાને કારણે ટોસમાં વિલંબ થયો હતો. ટોસ ભારતીય સમય અનુસાર 7.30 વાગ્યે થવાનો હતો. આ પછી અમ્પાયરોએ રાત્રે 8 વાગ્યે મેદાનનું નિરીક્ષણ કર્યું. આ સમય દરમિયાન એવું નક્કી કરવામાં આવ્યું હતું કે આગામી તપાસ રાત્રે 9 વાગ્યે થશે. દરમિયાન, ફ્લોરિડામાં ફરીથી વાદળછાયું વાતાવરણ બન્યું હતું.

અમ્પાયર રાત્રે 9 વાગ્યે ગ્રાઉન્ડ પર પહોંચ્યા અને નક્કી કર્યું કે આગળનું નિરીક્ષણ 10 વાગ્યે કરવામાં આવશે. પરંતુ આ પછી પણ પરિર્સ્થિતિ રમવા માટે યોગ્ય ન હોવાથી મેચ રદ કરવાનો નિર્ણય લેવામાં આવ્યો હતો.

અમેરિકાએ ટૂર્નામેન્ટમાં 4 મેચ રમી છે અને 2 જીતી છે. 1માં ટીમ હારી અને 1 અનિર્ણિત રહી. યુએસએમાં 5 અંક છે. બીજી તરફ, આયર્લેન્ડે અત્યાર સુધી 3 મેચ રમી છે અને તે હજુ જીતી શકી નથી. આયર્લેન્ડનો 1 પોઈન્ટ છે. આયર્લેન્ડ તેની છેલ્લી ગ્રુપ મેચમાં પાકિસ્તાન સામે ટકરાશે.

આ મેચ 16 જૂને રમાશે. પાકિસ્તાનના ત્રણ મેચમાં એક જીત અને બે હાર બાદ બે પોઈન્ટ છે. તેણે તેની છેલ્લી મેચ આયર્લેન્ડ સામે રમવાની છે અને જો પાકિસ્તાન આ મેચ જીતી જશે તો પણ તે અમેરિકાના પાંચ પોઈન્ટ સુધી પહોંચી શકશે નહીં. જેના કારણે પાકિસ્તાનનું આગામી રાઉન્ડમાં જવાનું સપનું ચકનાચૂર થઈ ગયું છે.