પીડિતા સાથે રેપનો વીડિયો આરોપીઓને સોંપી શકાય નહીં : ગુજરાત હાઈકોર્ટ

આરોપીઓને DVD ની પાંચ નકલ સોંપવાના નીચલી કોર્ટના આદેશને ભૂલભરેલો ગણાવી હાઇકોર્ટે રદ કર્યો : રાજુલાના એડી.સેશન્સ જજે આરોપીઓને DVD આપવાનો આદેશ કર્યો હતો

અમદાવાદ : કાયદાની એક અત્યંત મહત્ત્વપૂર્ણ બાબતને સ્પષ્ટ કરતાં હાઈકોર્ટે એવો આદેશ કર્યો છે કે, પીડિતા સાથે રેપ દરમિયાન બનાવેલા વીડિયોની DVD આરોપીઓને સોંપી શકાય નહીં. આ સ્પષ્ટતા કરવાની સાથે હાઈકોર્ટે નીચલી કોર્ટનો એ આદેશ પણ ફગાવી દીધો હતો, જેમાં કોર્ટે DVDની પાંચ નકલ બનાવી આરોપીઓને આપવાનો હુકમ કર્યો હતો.

પ્રસ્તુત કેસમાં હાઇકોર્ટના જસ્ટિસ જે.સી.દોશીએ એવું અવલોકન કર્યું હતું કે, આ ઘટનામાં ગુનો બન્યો એ વખતે પીડિતા સગીરવયની હતી અને નીચલી કોર્ટના આદેશ મુજબ એ સંપૂર્ણપણે સ્પષ્ટ થાય છે કે તેની ઓળખ છતી થઈ શકે છે. આવા તબક્કે કોર્ટે DVDની નકલ આરોપીઓને આપવી એવું વલણ અપનાવવા કરતાં આરોપીઓ અને તેના વકીલોને ચેમ્બરમાં ડોક્યુમેન્ટ્સની ચકાસણી કરી લેવાની તક આપવી જોઇએ. જો એકવાર પીડિતા સાથે બનેલી ઘટના જેમાં રેકોર્ડ છે એ DVD આરોપીઓને સોંપી દેવામાં આવે તો પીડિતાની ઓળખ છતી થવાનો ભય રહે છે અને તે ઘટના અનેક લોકો સુધી પહોંચી શકે છે.

હાઈકોર્ટે આદેશમાં નોંધ્યું હતું કે, નીચલી કોર્ટના આદેશથી સંબંધિત DVD નો દુરુપયોગ નકારી શકાય નહીં. આરોપીઓને આ પ્રકારના ડોક્યુમેન્ટ્સની ચકાસણી વકીલો અહીં સુધી કે ઈંઝ નિષ્ણાંતની હાજરીમાં કરવાનો અધિકાર છે, પરંતુ એનાથી વિશેષ અધિકાર નથી. નીચલી કોર્ટે DVDની પાંચ નકલ તૈયાર કરવાનો આદેશ કરીને ભૂલ કરી હોવાનું જણાય છે. તેથી આ આદેશ સામે પીડિતાએ કરેલી રિવિઝન અરજીને ગ્રાહ્ય રાખવામાં આવે છે અને DVDની નકલ આરોપીઓને આપવાનો આદેશ રદ કરવામાં આવે છે.

સાથે જ કોર્ટને આદેશ કરવામાં આવે છે કે તેઓ આ સંદર્ભમાં સુપ્રીમ કોર્ટના ગોપાલક્રિષ્ણાના આદેશમાં આપેલી ગાઈડલાઈન્સનો અમલ કરવો.
ખાસ કરીને શારીરિક શોષણના કૃત્યની DVDની ચકાસણી કરવાના સંદર્ભમાં આ ગાઇડલાઇન્સનો અમલ કરવો.પ્રસ્તુત કેસમાં અમરેલી જિલ્લાના ડુંગર પોલીસ સ્ટેશનમાં નોંધાયેલી ફરિયાદનો મામલો સામે આવ્યો હતો.

જેમાં પીડિતા દ્વારા હાઈકોર્ટ સમક્ષ એક અરજી કરીને નીચલી કોર્ટના આદેશને પડકારવામાં આવ્યો હતો. હાઈકોર્ટે આદેશમાં નોંધલી હકીકત મુજબ પીડિતા સાથે જુદીજુદી પાંચ વ્યક્તિઓ દ્વારા દુષ્કર્મ કરવામાં આવ્યો હતો. વારંવાર થયેલા દુષ્કર્મ અને ઘટનાના બનાવેલા વીડિયોથી ત્રસ્ત સગીરાએ આરોપીઓ વિરૂદ્ધ ફરિયાદ કરી હતી. ત્યારબાદ આ કેસમાં રાજુલાના એડી.સેશન્સ જજે આરોપીઓને DVD આપવાનો આદેશ કર્યો હતો. તેથી આ આદેશને રદ કરવા પીડિતાએ હાઇકોર્ટમાં રિટ કરી હતી.