![]() |
![]() SANJ SAMACHAR | Date: 04-06-2024 Tuesday | Rajkot |
|
રાજકોટ,તા.4
મુંબઈ શેરબજારમાં આજે પ્રારંભીક કામકાજોમાં પ્રચંડ કડાકો સર્જાયો હતો. લોકસભા ચૂંટણીમાં ભાજપ-એનડીએને પ્રચંડ બહુમતી મળવાની આશા ધૂળધાણી થઈ જતા માર્કેટમાં વેચવાલીનો મારો નીકળ્યો હતો અને તમામે તમામ શેરોમાં ગાબડા પડયા હતા. સોમવારની તેજીથી તદન વિપરીત બમણા જોરની મંદી થઈ હતી.
શેરબજારમાં કામકાજની શરૂઆત થઈ ત્યારે જ લોકસભાની ચૂંટણીના પરિણામોનો ટ્રેન્ડ આવવો શરુ થઈ ગયો હતો. એકઝીટ પોલ જેવા પરિણામ નહી આવવાની શંકાથી શરૂઆતથી જ નબળાઈ આવી ગઈ હતી અને ટ્રેન્ડ વધુ સ્પષ્ટ થવા સાથે વેચવાલીનો મારો નીકળ્યો હતો. તમામે તમામ શેરોમાં જોરદાર ગાબડા પડવા લાગ્યા હતા.
સવારે 11 વાગ્યાની સ્થિતિએ મુંબઈ શેરબજારનો સેન્સેટીવ ઈન્ડેકસ 3100 પોઈન્ટના કડાકાથી 73300 સાંપડયો હતો. જે ઉંચામાં 76300 તથા નીચામાં 73156 હતો. નેશનલ સ્ટોક એકસચેંજનો નિફટી 998 પોઈન્ટના કડાકાથી 22265 હતો. જે ઉંચામાં 23179 તથા નીચામાં 22238 હતો. પ્રચંડ કડાકાના પગલે પ્રારંભીક બે કલાકમાં જ ઈન્વેસ્ટરોની સંપતિમાં 11 લાખ કરોડનું ધોવાણ થઈ ગયું હતું.