ખાલિસ્તાની આતંકી પન્નુની હત્યાના ષડયંત્ર મામલે...

અમેરિકાની કોર્ટમાં રજૂ થયેલ નિખિલ ગુપ્તાએ પોતાને નિદોર્ષ ગણાવ્યો

28 જૂન સુધી ગુપ્તાને કસ્ટડીમાં રાખવા આદેશ

ન્યુયોર્ક (અમેરિકા), તા.18
ભારતીય નાગરિક નિખિલ ગુપ્તા (ઉ.52)ને શુક્રવારે ચેક રિપબ્લિકથી અમેરિકા લાવવામાં આવ્યો હતો. અમેરિકાની સરકારની વિનંતી પર ગયા વર્ષે ચેક રિપબ્લિકમાં તેની ધરપકડ કરવામાં આવી હતી. નિખિલ ગુપ્તાના વકીલના જણાવ્યુ હતું કે, ’તેમના અસીલને સોમવારે ન્યૂયોર્કની ફેડરલ કોર્ટમાં રજૂ કરવામાં આવ્યો હતો, જ્યાં તેમણે (અસીલે) પોતાને નિર્દોષ બતાવ્યો હતો.

આ મામલો બંને દેશો માટે ઘણો જટિલ છે. પરંતુ મહત્વપૂર્ણ પણ છે તેથી અમે કોઈપણ પ્રકારની ઉતાવળ ટાળવા માંગીએ છીએ.’ નિખિલ ગુપ્તાએ કોર્ટ સમક્ષ કહ્યું કે તેના પર ખોટો આરોપ લગાવવામાં આવ્યો છે. 

અગાઉ, ચેક રિપબ્લિકની કોર્ટે નિખિલ ગુપ્તાને અમેરિકા પ્રત્યાર્પણ કરવાની વિનંતીને ફગાવી દીધી હતી. ત્યારે હવે ન્યૂયોર્ક કોર્ટે નિખિલ ગુપ્તાને 28 જૂને સુનાવણી સુધી કસ્ટડીમાં રાખવાનો આદેશ આપ્યો છે. તેમના વકીલે જામીન માટે અરજી કરી ન હતી.

ઉલ્લેખનીય છે કે, અમેરિકાના દબાણને પગલે ગયા વર્ષે જૂન મહિનાની 30મી તારીખે નિખિલ ગુપ્તાની ચેક રિપબ્લિકની પોલીસ દ્વારા ધરપકડ કરવામાં આવી હતી. નિખિલ પર આરોપ લગાવવામાં આવ્યો છે કે અમેરિકામાં સક્રિય ખાલિસ્તાની આતંકી ગુરપતવંત પન્નૂની હત્યાનું કાવતરુ ઘડવામાં તેઓ સામેલ હતા. હવે પન્નુની હત્યા કેસમાં કાર્યવાહી શરૂ કરવામાં આવી છે.