પ્રથમ રાઉન્ડમાં જ દે ધનાધન: ખંભાળીયામાં છ કલાકમાં જ 10 ઈંચ વરસાદ

એક જ દિવસમાં મોસમનો 32.5 ટકા વરસાદ વરસી ગયો: ભાણવડમાં 2.5, દ્વારકામાં સવા ઈંચ: સલાયા-ફલ્લામાં 0॥ ઈંચ: કોટડા સાંગાણીનાં ભાડુઈ ગામે પણ ધોધમાંર 4-ઈંચ પાણી પડી ગયું

રાજકોટ,તા.17
દક્ષિણ ગુજરાતમાં ચોમાસુ મંદ પડી ગયા બાદ ધીમીગતિએ આગળ વધી રહ્યું છે ત્યારે, ગઈકાલે પ્રથમ રાઉન્ડમાં જ મેઘરાજા ખંભાળીયા ઉપર ઓળધોળ થઈ ગયા હતા. અને છ કલાકમાં જ 10-ઈંચ વરસાદ પડી જતા ખંભાળીયા જળ બંબોળ થઈ ગયું હતું.આ ઉપરાંત સલાયા, ફલ્લા, અને કોટડા સાંગાણી, પંથકમાં પણ હળવો વરસાદ પડયો હતો.

ખંભાળિયા તેમજ ભાણવડ પંથકમાં રવિવારે ચોમાસાના પ્રારંભે જ મેઘ મહેર વરસી હતી અને ખંભાળિયામાં રવિવારે છ કલાકમાં મુશળધાર 10 ઈંચ સાથે સાંજે છ વાગ્યા સુધીમાં કુલ પોણા 10 ઈંચ જેટલો વરસાદ ખાબકી ગયો હતો. આ સાથે ભાણવડ તાલુકામાં પણ અઢી ઈંચ જેટલો તેમજ દ્વારકામાં ગત મધરાત્રે સવા ઈંચથી વધુ વરસાદ નોંધાયો છે.

હવામાન વિભાગ દ્વારા અગાઉ જારી કરવામાં આવેલી આગાહીમાં દેવભૂમિ દ્વારકા જિલ્લામાં ભારે વરસાદની આગાહી ન હતી. તેમ છતાં પણ શનિવારે રાત્રે મેઘાના મંડાણ થયા હતા. શનિવારે રાત્રે આશરે ત્રણેક વાગ્યે શહેરમાં જોરદાર ઝાપટું વરસી જતા માર્ગો પર પાણી ચાલી નીકળ્યા હતા. આ વરસાદ ખંભાળિયા તાલુકામાં 8 મીલીમીટર અને ભાણવડ તાલુકામાં વહેલી સવારનો 4 મીલીમીટર નોંધાયો હતો. આ પછી પણ રવિવારે સવારે છ થી નવેક વાગ્યા દરમ્યાન ભાણવડ તાલુકામાં ધોધમાર 55 મીલીમીટર સાથે આજે સવાર સુધીમાં ભાણવડ તાલુકામાં 60 મીલીમીટર (અઢી ઈંચ) વરસાદ પડી ગયો હતો.

મેઘરાજાએ ખંભાળિયા તાલુકામાં જાણે મુકામ કર્યો હોય તેમ રવિવારે બપોરે એકાદ વાગ્યાથી શરૂ થયેલો ધોધમાર વરસાદ બપોરે પાંચેક વાગ્યા સુધી અવિરત રીતે વરસ્યો હતો. જેમાં સૌથી વધુ બપોરે 2 થી 4 દરમિયાન મુશળધાર 5 ઈંચ વરસાદ એક સાથે વરસતા નીચાણવાળા વિસ્તારોમાં જળબંબાકાર જેવી પરિસ્થિતિ જોવા મળી હતી. આ પછી પણ વધુ 2 ઈંચ જેટલો વરસાદ પડી ગયો હતો. આમ, શનિવારે રાત્રીથી ઓળઘોળ થયેલા મેઘરાજાએ રવિવારે પાંચેક વાગ્યા સુધીમાં ધોધમાર કુલ પોણા 10 ઈંચ (241 મીલીમીટર) પાણી વરસાવી દીધું હતું.

ધોધમાર વરસાદના પગલે અહીંના નગર ગેઈટ, સલાયા ગેઈટ, ગોવિંદ તળાવ, વિગેરે નીચાણવાળા વાળા વિસ્તારોમાં ગોઠણ સમા પાણી વહ્યા હતા. ભારે વરસાદના પગલે નાના જળસ્ત્રોતોમાં જાણે ઘોડાપૂર જેવા પાણી આવ્યા હતા. 

 ખંભાળિયા - દ્વારકા માર્ગ પરના બારા, વડત્રા વિગેરે ગામોમાં ચાર ઈંચ સુધી વરસાદ વરસતા અનેક નદીઓમાં ઘોડાપૂર જોવા મળ્યા હતા. આ ઉપરાંત વિરમદળ, ઝાકસીયા, સામોર સહિતના ગામોમાં પણ પાંચથી છ ઈંચ સુધી વરસાદ વરસતા નદીઓ વહેતી થઈ ગઈ હતી. આ સાથે ખંભાળિયા - ભાણવડ માર્ગ પરના ગામોમાં પણ ધોધમાર વરસાદ વરસ્યાના વાવડ છે.

ખંભાળિયા બાદ દેવભૂમિ દ્વારકા જિલ્લાના દ્વારકા તાલુકામાં આજે સવારે ચઢતા પહોરે 32 મીલીમીટર (સવા ઈંચ) વરસાદ પડી ગયો હતો. જ્યારે કલ્યાણપુર પંથકમાં ગત મધ્ય રાત્રિના છૂટા છવાયા ઝાપટાથી પાંચ મીલીમીટર પાણી વરસ્યાનું પણ નોંધાયું છે. ખંભાળિયા શહેરને પાણી પૂરંમ પાડતા ઘી ડેમમાં નવા નીરની નોંધપાત્ર આવક થઈ નથી. રવિવારના વરસાદથી ખંભાળિયા પંથકમાં મોસમનો કુલ 32.5 ટકા તેમજ ભાણવડ તાલુકામાં 11.5 ટકા વરસાદ નોંધાયો છે.

ખંભાળિયામાં શનિવારે રાત્રે વરસાદી ઝાપટાના પગલે લાંબો સમય વીજ પુરવઠો ખોરવાઈ જતા કાળઝાળ ગરમીમાં લોકો ત્રાસી ગયા હતા. આવી જ પરિસ્થિતિ શહેરમાં રવિવારે બપોરે તેમજ સાંજે પણ જોવા મળી હતી અને અવારનવાર સતત અડધો-પોણો કલાક વીજ વિક્ષેપ રહેતા વીજ તંત્રની પ્રિ-મોન્સૂન કામગીરી સામે લોકોમાં પ્રશ્નો ખાડા થયા છે. વરસાદના પગલે થોડો સમય વાતાવરણમાં ઠંડક પ્રસરી ગઈ હતી. પરંતુ પછી ઉકળાટ અને બફારાનું પ્રમાણ વધ્યું હતું. રવિવારે આખો દિવસ સૂર્યનારાયણના દર્શન થયા ન હતા. જો કે આજરોજ સોમવારે વાતાવરણ ચોખ્ખું બની રહ્યું હતું અને સવારથી જ તડકો નીકળતા લોકોએ રાતનો દમ ખેંચ્યો છે.

સલાયા: વરસાદની એન્ટ્રી:-
ખંભાળિયા તાલુકાના સલાયા ગામે ગત વહેલી સવારથી જ વાદળો બંધાયા હતા.તેમજ પવન પણ પડી ગયો હતો.ગરમીનું પ્રમાણ ખૂબ વધ્યુ હતું.બપોરના 3 થી 4 વાગ્યા સુધીમાં ધીમી ધારે અડધો ઈંચ જેટલો વરસાદ થયો હતો. આ માત્ર અડધા ઈંચ વરસાદમાં જ વીજ પુરવઠો ખોરવાઈ જતા લોકોને ભારે તકલીફ પડી હતી.

ફલ્લામાં અડધો ઈંચ:-
જામનગર તાલુકાના ફલ્લા ગામે આજે બપોર બાદ વાતાવરણમાં એકાએક પલ્ટો આવ્યો હતો. અને વરસાદ વાતાવરણ સાથે વરસાદી જાપટા પડયા હતાં.અહી અડધો ઈંચ વરસાદ (15મી.મી) નોંધાયો હતો.ફલ્લા નજીકમાં ખીલોસ, રાણાજીતપર, લાખાણી, વંથલી, વરણા વગેરે ગામોમાં પણ મેઘરાજાનું આગમન થયું હતું. સીઝનનો પ્રથમ વરસાદનું આગમન થતા વાતાવરણમાં ઠંડક પ્રસરી હતી.

કોટડા સાંગાણી:-
કોટડાસાંગાણી તાલુકા ના ગામો માં સવારથી બપોર સુધી કાળઝાળ ગરમીમાં  ઉકરટથી સાંજ ના સમયે એકા એક વાતાવરણ માં વાદરીયુ વાતવણ થયેલ સાંજના સમયે વરસાદ સરૂ થયેલ જેમાં ભાડવા રાજપરા ભાડુઈ ગામે 4 ઈંચ જેટલો વરસાદ પડેલ હોય છે તેવું જાણવા મળેલ જેમાં ભાડવા થી રાજપરા જતો રસ્તો વધારે વરસાદ પડવાથી રસ્તો બંધ થયેલ લોકોને રાજપરા જવા માટે ભારે મુશ્કેલી સામનો કરવો પડે 

જમા મોટા માંડવા માણેકવાડા બગડીયા દેતડીયા દેવરીયા ભાડુઈ ચિત્રાવાવ સર રામોદ આપણ ગામોમાં વરસાદ પડવાના સમાચાર પ્રાપ્ત થયેલા જેમાં ભાડવા ગામે વીજળી ગુલ થયેલ છે.