અંતિમ બોલમાં બેટ્સમેન રન આઉટ થયો નહિતો મેચ સુપર ઓવરમાં પહોંચી હોત

નેપાળે દક્ષિણ આફ્રિકા જેવી દિગ્ગજ ટીમના નાકે દમ લાવી દીધો, રોમાંચક મેચમાં માત્ર 1 રનથી હાર્યું

નેપાળે ભલે મેચને હારી હોય પણ તેની રમત જીત મેળવવા જેટલી જ બિરદાવવા લાયક ક્રિકેટ ચાહકો માની રહ્યા છે

કિંગસ્ટન,તા.15
નેપાળ અને દક્ષિણ આફ્રિકા વચ્ચે ટી20 વિશ્વકપ 2024 ની મેચ કિંગ્સસ્ટનમાં રમાઈ રહી હતી. આ મેચમાં શક્તિશાળી ગણાતી દક્ષિણ આફ્રિકાની ટીમને ટાર્ગેટને સુરક્ષિત રાખવામાં જાણે પરસેવો છૂટી ગયો હતો. નેપાળની ટીમના ખેલાડીઓએ મેચને રોમાંચક બનાવી દીધી હતી અને જાણે કે જીત હાથવેંતમાં લાવી દીધી હતી. પરંતુ અંતિમ બોલ પર રન આઉટ સાથે જ આફ્રિકાને જીવમાં જીવ આવ્યો હતો.

નેપાળે ભલે મેચને હારી હોય પણ તેની રમત જીત મેળવવા જેટલી જ બિરદાવવા લાયક ક્રિકેટ ચાહકો માની રહ્યા છે. કારણ કે દક્ષિણ આફ્રિકાની ટીમ ટૂર્નામેન્ટમાં દમદાર પ્રદર્શન કરી રહી છે. તેની સામે મજબૂતાઈથી લડત આપવા સાથે અંતિમ બોલ સુધી આપેલી લડતે મેચને જબરદસ્ત બનાવી દીધી હતી. એકસમયે તો ટૂર્નામેન્ટમાં વધુ એક ઉલટફેર જોવા મળશે એમ લાગી રહ્યું હતુ.

દક્ષિણ આફ્રિકાએ 115 રન નોંધાવ્યા : 
નેપાળ ક્રિકેટ ટીમના સુકાની રોહિત પોંડેલે ટોસ જીતીને પ્રથમ બોલિંગ પસંદ કરી હતી. નિર્ણય મુજબ જ નેપાળે પ્રથમ બોલિંગ કરતા સારુ પ્રદર્શન કર્યું હતુ. દક્ષિણ આફ્રિકાની ટીમને મર્યાદિત સ્કોર પર જ રોકવામાં નેપાળના બોલરો સફળ રહ્યા હતા. જેને લઈ 20 ઓવરમાં દક્ષિણ આફ્રિકાની ટીમ 115 રન નોધાવી શકી હતી.

નેપાળના કુશલ ભૂર્થેલ અને દીપેન્દર સિંહ એરીએ મહત્વની ભૂમિકા નિભાવતા શાનદાર બોલીંગ કરી હતી. બંનેએ મળીને જ દક્ષિણ આફ્રિકાની 7 વિકેટો ગેરવી દીધી હતી. જેમાં કુશલે 4 વિકેટ 4 ઓવરમાં 19 રન આપીને ઝડપી હતી. જ્યારે દિપેન્દર સિંહે ત્રણ વિકેટ ઝડપી હતી.

અંતિમ બોલ સુધી રોમાંચ
કિંગ્સ્ટનમાં નેપાળ સામે દક્ષિણ આફ્રિકાએ 116 રનનો ટાર્ગેટ રાખ્યો હતો. દક્ષિણ આફ્રિકાના બોલરોએ પણ બોલિંગ જબરદસ્ત કરી હતી. જેને લઈ નેપાળના બેટર્સને માટે સારી રમત છતાં આફ્રિકી બોલર્સ તેમના માટે પડકારરુપ હતા. જેનો સામનો કરતા નેપાળે અંતિમ બોલ સુધી લડાઈ જારી રાખી હતી. જેને લઈ મેચ જબરદસ્ત રોમાંચક બની હતી અને ટૂર્નામન્ટમાં વધુ એક ઉલટફેર જોવા મળે એવી સ્થિતિ સર્જાઈ હતી.

અંતિમ પાંચ ઓવરમાં નેપાળને 25 રનની જરુર હતી અને હાથ પર 7 વિકેટ હતી. પરંતુ મેચ પણ હવે નેપાળના હાથમાં જ જઈ રહેલી જોવામાં આવી રહી હતી. પરંતુ અંતિમ ઓવરમાં નેપાળે 8 રન નોંધાવવાના રહ્યા હતા. જ્યારે અંતિમ 2 બોલ પર 2 રનની નેપાળને વિજય માટે જરુરી હતી. પરંતુ સેક્ધડ લાસ્ટ બોલ ડોટ રહ્યો હતો અને અંતિમ બોલ પર રન આઉટ વિકેટ ગુમાવી હતી. આમ માત્ર 1 જ રનથી નેપાળે હાર સહન કરવી પડી હતી.

અંતિમ બોલ પર નેપાળનો ખેલાડી રન આઉટના બદલે એક રન મેળવવામાં સફળ રહ્યો હોત તો પણ મેચ સુપર ઓવરમાં પહોંચી હોત. આમ દક્ષિણ આફ્રિકા માટે આ સ્થિતિ પણ હારથી ઓછી ના હોત. કારણ કે નેપાળ જેવી ટીમ તાકાતવર ટીમને મેચને સુપર ઓવરમાં લઈ જાય એ પણ મોટી સફળતા રુપ તેમના માટે હતી. જોકે અંતિમ બોલ પર રન આઉટે દક્ષિણ આફ્રિકાના ક્રિકેટ ચાહકો અને ક્રિકેટ ટીમને જીવમાં જીવ પૂર્યો હતો.