દેશના આ રહસ્યમય મંદિરોમાં બને છે ચોંકાવનારી ઘટનાઓ

ભારત તેના પ્રાચીન મંદિરો માટે વિશ્વભરમાં પ્રખ્યાત છે. દેશમાં એવા અસંખ્ય નાના-મોટા મંદિરો છે જે તેમની સંસ્કૃતિ, માન્યતાઓ અથવા સિદ્ધિઓ માટે જાણીતા છે. તેવી જ રીતે, દેશમાં ઘણા રહસ્યમય મંદિરો છે, જે તેમની પરંપરાઓ, માન્યતાઓ અને રહસ્યમય કારણોસર જાણીતા છે.

► કામાખ્યા દેવી મંદિર, ગુવાહાટી

માતા કામાખ્યા દેવીનું મંદિર સમગ્ર ભારતમાં પ્રખ્યાત છે. આ મંદિર 52 શક્તિપીઠોમાંથી એક છે. ભારતના લોકો તેને અઘોરીઓ અને તાંત્રિકોનો ગઢ માને છે. તે આસામની રાજધાની દિસપુરથી લગભગ 10 કિમી દૂર નિલાંચલ પર્વત પર આવેલું છે.

મંદિરની ખાસ વાત એ છે કે અહીં ન તો દેવી માતાની કોઈ મૂર્તિ છે અને ન તો કોઈ ચિત્ર છે. તેના બદલે, અહીં એક તળાવ છે, જે હંમેશા ફૂલોથી ઢંકાયેલું રહે છે. આ મંદિરમાં દેવીની યોનિની પૂજા કરવામાં આવે છે. આજે પણ અહીં માતાને માસિક આવે છે.

પુરાણો અનુસાર, ભગવાન વિષ્ણુએ માતા સતીને તેમના ચક્રથી 51 ભાગોમાં વહેંચ્યા હતા. જ્યાં પણ આ ભાગો પડ્યા, ત્યાં માતાની શક્તિપીઠની રચના થઈ. આ સ્થાન પર માતાની યોનિ પડી હતી, તેથી અહીં તેમની કોઈ મૂર્તિ નથી પરંતુ તેમની યોનિની પૂજા કરવામાં આવે છે. આજે આ સ્થાન એક શક્તિશાળી પીઠ છે. દુર્ગા પૂજા, પોહન બિયા, દુર્ગા દૌલ, બસંતી પૂજા, મદન દેઉલ, અંબુવાસી અને મનસા પૂજા પર આ મંદિરની ભવ્યતા જોવા જેવી છે.

► અસીરગઢ કિલ્લામાં આવેલું શિવ મંદિર

મધ્યપ્રદેશના બુરહાનપુર જિલ્લાના અસીરગઢમાં એક શિવ મંદિર આવેલું છે. અસીરગઢ કિલ્લામાં સ્થિત શિવ મંદિરનો પ્રાચીન મહિમા ઘણા ધાર્મિક ગ્રંથોમાં પણ જોવા મળે છે. એટલું જ નહીં, આ પ્રાચીન શિવ મંદિરમાં હાજર ભગવાન ભોલેનાથના દર્શન કરવા માટે દૂર-દૂરથી ભક્તો અસીરગઢ કિલ્લા પર પહોંચે છે.

આ મંદિરનું એક મોટું રહસ્ય એ છે કે મંદિર દરરોજ સાંજે બંધ હોવા છતાં, જ્યારે સવારે મંદિરના દરવાજા ખુલે છે, ત્યારે શિવલિંગ પર ફૂલ અને રોલી ચઢાવેલી હોય છે. આટલું જ નહીં, શિવ મંદિરમાં કોઈએ પૂજા કરી હોવાના પુરાવા પણ છે. જો કે મંદિરના દરવાજા બંધ હોવા છતાં સવારે દરવાજા ખોલતાની સાથે જ શિવલિંગ પર ચઢાવવા માટે ફૂલ અને રોલી ક્યાંથી આવે છે તે તપાસનો વિષય છે.

પૌરાણિક માન્યતાઓ અનુસાર, મહાભારતના અશ્વત્થામાએ તેમના પિતાના મૃત્યુનો બદલો લેતી વખતે ભૂલ કરી હતી અને ભગવાન કૃષ્ણએ તેમને યુગો સુધી ભટકવાનો શ્રાપ આપ્યો હતો. કહેવાય છે કે અશ્વત્થામા છેલ્લા 5 હજાર વર્ષથી ભટકી રહ્યા છે. કહેવાય છે કે અશ્વત્થામા આજે પણ આ શિવ મંદિરમાં પૂજા કરવા આવે છે. સ્થાનિક રહેવાસીઓ અશ્વત્થામા સાથે જોડાયેલી ઘણી વાર્તાઓ કહે છે. તેઓ કહે છે કે જેણે પણ અશ્વત્થામાને જોયો તેની માનસિક સ્થિતિ કાયમ માટે બગડી ગઈ.

► કોડુંગલ્લુર ભગવતી મંદિર,કેરળ

કોડુંગલ્લુર દેવી મંદિર એક ખૂબ જ પ્રાચીન મંદિર છે, જે કેરળ રાજ્યના ત્રિશૂર જિલ્લામાં છે. જો કે દક્ષિણ ભારતમાં ઘણા મંદિરો છે પરંતુ તમામ મંદિરોમાં આ મંદિર સૌથી અદ્ભુત છે. કોડુંગલ્લુર દેવી મંદિરને શ્રી કુરમ્બા ભગવતી મંદિર તરીકે પણ ઓળખવામાં આવે છે.

આ મંદિરમાં માતા ભદ્રકાલી બિરાજમાન છે, તેમની તેમના કાળા રૂપમાં પૂજા કરવામાં આવે છે. અહીં આવતા લોકો દેવીને કુરમ્બા અથવા કોડુંગલુર અમ્મા તરીકે બોલાવે છે. એવું માનવામાં આવે છે કે અહીં કરવામાં આવતી પૂજા અથવા અનુષ્ઠાન ફક્ત દેવીની સૂચના પર જ કરવામાં આવે છે.

► કરણી માતા મંદિર, બિકાનેર

રાજસ્થાનના બિકાનેરમાં આવેલું કરણી માતાનું મંદિર પ્રવાસીઓમાં ખૂબ જ પ્રખ્યાત છે. આ મંદિર કરણી માતાને સમર્પિત છે. અહીં રહેતા લોકોનું માનવું છે કે કરણી માતા દેવી દુર્ગાનો અવતાર છે જે લોકોની રક્ષા કરે છે. કરણી માતા ચારણ જાતિના યોદ્ધા ઋષિ હતા. એક તપસ્વીનું જીવન જીવીને, તે અહીં રહેતા લોકોમાં આદરણીય હતી. જોધપુર અને બિકાનેરના મહારાજાઓ તરફથી વિનંતીઓ મળ્યા બાદ તેમણે મેહરાનગઢ અને બિકાનેરના કિલ્લાઓનો શિલાન્યાસ પણ કર્યો હતો.

જો કે તેમને સમર્પિત ઘણા મંદિરો છે, પરંતુ બિકાનેરથી 30 કિલોમીટર દૂર દેશનોક શહેરમાં આવેલું આ મંદિર સૌથી વધુ જાણીતું છે. બિકાનેરમાં આવેલું કરણી માતાનું મંદિર માત્ર તેની વાસ્તુકલા માટે જ લોકપ્રિય નથી, પરંતુ આ મંદિર 25,000થી વધુ ઉંદરોનું ઘર છે, જે અવારનવાર અહીં ફરતા જોવા મળે છે. સામાન્ય રીતે કોઈ વ્યક્તિ ઉંદરનો એઠો પ્રસાદ ખાવાને બદલે ફેંકી દે છે, પરંતુ અહીં માત્ર ઉંદરોનો એઠો પ્રસાદ જ ભક્તોને આપવામાં આવે છે. આ મંદિરની પવિત્ર પ્રથા છે. આ જ કારણ છે કે ભારત અને વિદેશના વિવિધ ખૂણાઓમાંથી લોકો આ અદભુત નજારો જોવા આવે છે.

► લેપાક્ષી મંદિર, આંધ્રપ્રદેશ

આેધ્રપ્રદેશના અનંતપુર જિલ્લામાં લેપાક્ષી નામનું ભગવાન શિવનું મંદિર છે. ભગવાન શિવના ક્રૂર અને વિકરાળ સ્વરૂપ ભગવાન વીરભદ્ર આ મંદિરમાં બિરાજમાન છે. આ કારણે આ મંદિરને વીરભદ્ર મંદિર પણ કહેવામાં આવે છે. આ મંદિર હવે હેંગિંગ પિલર ટેમ્પલના નામથી દુનિયાભરમાં પ્રખ્યાત થઈ ગયું છે. જો કે આ મંદિરમાં 70 સ્તંભો છે, પરંતુ આ મંદિરના આકર્ષણનું કેન્દ્ર હવામાં લટકતો સ્તંભ છે જેના પર મંદિરનું સમગ્ર વજન આધારિત છે. મંદિરમાં હવામાં લટકતા આ સ્તંભને આકાશ સ્તંભ માનવામાં આવે છે. આ થાંભલો જમીનથી અડધો ઇંચ ઊંચો છે.આ મંદિર વિશે એવી માન્યતા છે કે જો હવામાં લટકતા આ સ્તંભની નીચેથી કપડું બહાર કાઢવામાં આવે તો તે વ્યક્તિના ઘરમાં હંમેશા સુખ-સમૃદ્ધિ રહે છે.

હવામાં લટકતા થાંભલા પાછળ એક લોકપ્રિય વાર્તા છે. દક્ષ પ્રજાપતિના યજ્ઞ પછી ભગવાન વીરભદ્રની ઉત્પત્તિ થઈ હોવાનું માનવામાં આવે છે. જ્યારે મહાદેવે માતા સતીના આત્મદાહ પછી તેમના વાળમાંથી વીરભદ્રની રચના કરી અને દક્ષ પ્રજાપતિને મારવા મોકલ્યા. પછી દક્ષની હત્યા પછી ભગવાન વીરભદ્રનો ક્રોધ શમતો ન હતો. તેની ગર્જનાથી પાતાળ થી લઈને આકાશ સુધી સૌ ગભરાઈ ગયા.ત્યારે ભગવાન શિવે તેમના ક્રોધને શાંત કરવા માટે તપસ્યા કરવાનો આદેશ આપ્યો. જે પછી કહેવાય છે કે આજે જ્યાં લેપાક્ષી મંદિર આવેલું છે તે જ જગ્યાએ ભગવાન વીરભદ્રે તપસ્યા કરીને પોતાના ક્રોધ પર કાબૂ મેળવ્યો હતો. એવું માનવામાં આવે છે કે આ મંદિરમાં હવામાં લટકતો સ્તંભ ભગવાન વીરભદ્રના ક્રોધને કારણે છે.

► સ્તંભેશ્વર મહાદેવ મંદિર, ગુજરાત

સ્તંભેશ્વર મહાદેવ મંદિર ગુજરાતની રાજધાની ગાંધીનગરથી લગભગ 175 કિમી દૂર જંબુસરના કાવી કંબોઇ ગામમાં આવેલું છે. જો ટ્રાફિક જામ ન હોય તો તમે ગાંધીનગરથી 4 કલાકમાં ડ્રાઇવ કરીને આ સ્થળે પહોંચી શકો છો. અરબી સમુદ્ર અને ખંભાતના અખાતથી ઘેરાયેલું આ મંદિર 150 વર્ષ જૂનું છે. આ મંદિરનો મહિમા જોવા માટે તમારે અહીં સવારથી રાત સુધી રોકાવું પડશે.

આ મંદિર ભારતના અદભુત અને રહસ્યમય મંદિરોમાં આવે છે. એવું કહેવાય છે કે આ મંદિર દિવસના અમુક સમય માટે સંપૂર્ણપણે ગાયબ થઈ જાય છે. ગાયબ થયા બાદ આ મંદિરનો એક પણ ભાગ દેખાતો નથી. તે ભરતી વખતે દરરોજ પાણીમાં ડૂબી જાય છે. પાણી હટાવ્યા બાદ તેને ફરીથી ભક્તો માટે ખોલવામાં આવે છે. એવું માનવામાં આવે છે કે આ મંદિર ભગવાન શિવના પુત્ર કાર્તિકેય દ્વારા બનાવવામાં આવ્યું હતું.