હીરો ઘોઘે જઇ આવ્યો જેવો ઘાટ !
લંડનથી અમેરિકા ગયા વગર જ ફલાઇટ 9 કલાકની યાત્રા કરી ફરી લંડનમાં જ લેન્ડ થઇ !
સોશ્યલ મીડિયામાં ટીકા થઇ, ફલાઇટને નજીકના એરપોર્ટ પર કેમ લેન્ડ ના કરાવાઇ
અમદાવાદ, તા. 14
એક અજીબોગરીબ ઘટનામાં 10 જૂનના રોજ હિથ્રો એરપોર્ટથી ટેક્સાસના હ્યુસ્ટન જવા ટેક-ઓફ થયેલી બ્રિટિશ એરવેઝની ફ્લાઈટ નવ કલાક બાદ પાછી લંડનમાં જ લેન્ડ થતાં આ મુદ્દો સોશિયલ મીડિયા પર ખાસ્સો ચર્ચાસ્પદ બન્યો હતો.
એક રિપોર્ટ અનુસાર આ ફ્લાઈટે એટલાન્ટિક મહાસાગર પાર કરી લીધો હતો અને ત્યારબાદ તેને અમેરિકા તરફ જવાને બદલે યુકે તરફ ડાયવર્ટ કરવામાં આવી હતી. બ્રિટિશ એરવેઝની ફ્લાઈટ નંબર 195માં કેટલા પેસેન્જર સવાર હતા તેની માહિતી નથી મળી શકી, આ ફ્લાઈટ સોમવારે સવારે હિથ્રો એરપોર્ટથી ટેક-ઓફ થઈને હ્યુસ્ટનના જ્યોર્જ બુશ ઈન્ટરકોન્ટિનેન્ટલ એરપોર્ટ પર લેન્ડ થવાની હતી.
ઓનલાઈન ફ્લાઈટ ટ્રેકર ફ્લાઈટરડાર 24 પર ઉપલબ્ધ ડેટા અનુસાર બોઈંગ 787-9 ડ્રીમલાઈનર એરક્રાફ્ટને ટેક-ઓફ થયાના પાંચ કલાક બાદ ડાયવર્ટ કરવામાં આવ્યું હતું. આ પ્લેનમાં 300 જેટલા પેસેન્જર્સ બેસી શકે છે, નવાઈની વાત એ છે કે આ એરક્રાફ્ટ નોર્થ અમેરિકામાં પ્રવેશીને કોસ્ટ ઓફ ન્યૂફાઉન્ડલેન્ડ પરથી ઉડી રહ્યું હતું ત્યારે જ તેને ડાયવર્ટ કરીને પાછું યુકે મોકલી દેવાયું હતું.
હિથ્રો એરપોર્ટ પરથી સવારે ટેક-ઓફ થયા બાદ નવ કલાક પછી આ એરક્રાફ્ટ ફરી ત્યાં લેન્ડ થયું ત્યાં સુધીમાં તેણે 4,833 માઈલનો પ્રવાસ કરી લીધો હતો પરંતુ પોતાના ડેસ્ટિનેશન કે પછી તેની આસપાસની કોઈ જગ્યાએ પહોંચવાને બદલે આ ફ્લાઈટ હતી ત્યાંની ત્યાં જ લેન્ડ થઈ હતી.
બ્રિટિશ એરવેઝે આ મામલે એવી સ્પષ્ટતા આપી હતી કે, એરક્રાફ્ટમાં માઈનોર ટેકનિકલ ઈશ્યૂ થવાના કારણે તેને લંડન પાછું બોલાવવામાં આવ્યું હતું. એરલાઈનના પ્રવક્તાએ કહ્યું હતું કે આ ફ્લાઈટ સહી-સલામત હિથ્રો એરપોર્ટ પર લેન્ડ થઈ હતી, અને પેસેન્જર્સને પણ કોઈ તકલીફ નહોતી થઈ.
જોકે, આ મામલાને સોશિયલ મીડિયા પર ચગાવતા કેટલાક લોકોએ અમેરિકા સુધી પહોંચી ગયેલી ફ્લાઈટને કેમ છેક ત્યાંથી પાછી યુકે બોલાવાઈ તેને લઈને સવાલો કર્યા હતા. તેમની એવી દલીલ હતી કે આ ફ્લાઈટને છેક યુરોપ લાવવાને બદલે તેને નજીકના જ કોઈ એરપોર્ટ પર ઉતારી શકાઈ હોત.
_copy.jpg)
.jpg)
.jpg)
.jpg)
