આ સુકાનીપદ સરળ નથી: ચાર હાર બાદ દિગ્ગજોના નિશાના પર હાર્દિક

નવી દિલ્હી : 
વર્તમાન IPL માં મુંબઈ ઈન્ડિયન્સના નિરાશાજનક પ્રદર્શનને કારણે ટીકાકારો ટીમની રણનીતિ અને નવા કેપ્ટન હાર્દિક પંડ્યાના નેતૃત્વ પર પણ સવાલો ઉઠાવી રહ્યા છે. IPLની 16 સીઝનમાં મુંબઈ ઈન્ડિયન્સ પાંચ વખત વિજેતા અને એક વખત રનર્સ અપ રહી છે. ટીમ 2019 અને 2020માં સતત બે વખત ચેમ્પિયન બની હતી.

જ્યારે તે પછી 2021, 2022 અને 2023માં તેનું પ્રદર્શન ઘટ્યું હતું. છેલ્લી સિઝનમાં, આ ટીમ પ્લેઓફમાં જગ્યા બનાવવામાં સફળ રહી હતી અને એકંદરે ચોથા સ્થાને રહી હતી. આ સિઝનમાં મુંબઈ ઈન્ડિયન્સ છમાંથી ચાર મેચ હાર્યા બાદ પોઈન્ટ ટેબલમાં આઠમા સ્થાને છે.

CSKના હાથે ટીમની ચોથી હાર બાદ ભૂતપૂર્વ મહાન બેટ્સમેન સુનીલ ગાવસ્કર અને ઈંગ્લેન્ડના ભૂતપૂર્વ કેપ્ટન કેવિન પીટરસને હાર્દિક પંડ્યાની ટીકા કરી હતી. ગાવસ્કરે કહ્યું, ’ઓહ, ખૂબ જ સામાન્ય બોલિંગ, સામાન્ય કેપ્ટનસી. ઋતુરાજ ગાયકવાડે શિવમ ડુવે સાથે સારી બેટિંગ કરી હોવા છતાં, તેને ઓછા સ્કોર પર રોકવો જોઈતો હતો.

મારું માનવું છે કે, તેને 185-190 રન સુધી સીમિત રાખવો જોઈતો હતો. કદાચ મેં લાંબા સમયથી જોયેલી સૌથી ખરાબ બોલિંગ, પંડ્યાએ ત્રણ ઓવરમાં 43 રન આપીને બે વિકેટ લીધી હતી અને બેટિંગમાં છ બોલમાં માત્ર બે રન જ બનાવી શક્યો હતો.

પીટરસને કહ્યું, ’મને લાગે છે કે રમતની બહારની બાબતોની હાર્દિક પંડ્યા પર ભારે અસર પડી રહી છે. જ્યારે તે ટોસ માટે જાય છે ત્યારે તે ખૂબ સ્મિત કરે છે. તે એવી રીતે અભિનય કરવાનો પ્રયાસ કરી રહ્યો છે કે જાણે તે ખૂબ જ ખુશ હોય. છે. તે ખુશ નથી.

આવું મારી સાથે પણ બન્યું હતું. મેં તેનો સામનો કર્યો છે અને હું તમને કહી શકું છું કે તે તમને અસર કરે છે. જ્યારે આવું થાય છે ત્યારે તેની અસર થાય છે. તેની અસર તેના ક્રિકેટ પર પડી રહી છે.

ભૂતપૂર્વ ભારતીય ક્રિકેટર ઈરફાન પઠાણએ કહ્યું કે, દરેક કાર્યમાં કુશળ હાર્દિક પંડ્યાને મુંબઈ ઈન્ડિયન્સની સારી કેપ્ટનશીપ કરવાની જરૂર છે. જ્યારે પણ મુંબઈ હાર્યું ત્યારે પંડ્યાએ મહત્વની ભૂમિકા ભજવી હતી. મેચમાં તમારે પરિસ્થિતિને ઝડપથી સ્વીકારવાની જરૂર છે. કમનસીબે પંડ્યા હજુ સુધી આ કરી શક્યો નથી.

હાર્દિક પંડયા ફરી ટ્રોલ થયો
હાર્દિક પંડયા જે દિવસથી રોહિત શર્માની જગ્યાએ મુંબઇ ઇન્ડિયન્સનો કેપ્ટન બન્યો ત્યારથી તે ક્રિકેટ પ્રેમીઓના નિશાના પર છે. મેદાન પર તેની સામે હટિંગ ચાલુ છે. હવે તે તેના કપડાને લઇને પણ સોશ્યલ મીડિયા પર ટ્રોલ થયો હતો.

હાલમાં જ ચેન્નાઇ સામે હાર્યા બાદ તે મુંબઇ એરપોર્ટ પર બ્લેક બનિયાન પહેરીને જોવા મળ્યો હતો. આ તસ્વીર ઇન્ટાગ્રામ જેવા સોશ્યલ મીડિયા પર વાયરલ થઇ અને યુઝર્સ તેના પર અભદ્ર ટિપ્પણીઓ કરવા લાગ્યા. એકે લખ્યું શું ઓછામાં ઓછું એક શર્ટ ખરીદી ન શકો ?