રાજસ્થાનમાં રાજકીય પ્રચાર રેલીમાં લોકોને વધુ આકર્ષવા ટ્રેકટર, જેસીબી અને કુસ્તીબાજો લવાય છે

India, Politics, Lok Sabha Election 2024 | 24 April, 2024 | 05:27 PM

સાંજ સમાચાર

બાડમેર : બાડમેરમાં ચૂંટણીનો ઉત્સાહ લોકોમાં જોવા મળી રહ્યો છે. આ વખતે ભાજપ, કોંગ્રેસ અને એક અપક્ષ ઉમેદવાર વચ્ચે ત્રિકોણીય મુકાબલો છે. રેલીમાં લોકોને આકર્ષવા ટ્રેક્ટર, જેસીબી અને કુસ્તીબાજો પણ લાવવામાં આવી રહ્યા છે.

વૈતુમાં પ્રચાર કરવા આવેલા ભાજપના ઉમેદવાર કૈલાશ ચૌધરીની રેલીમાં 100 જેટલા ટ્રેક્ટર અને ડઝન જેટલા જેસીબી મશીનો લાવવામાં આવ્યા હતા. ગ્રેટ ખલી પણ કૈલાશ ચૌધરીને સપોર્ટ કરવા પહોંચ્યા હતા.

જેસીબી ચાલકોની લોટરી લાગી
રેલીમાં આવેલ નેતાઓ પર ફૂલ વરસાવવા માટે જેસીબીનો ઉપયોગ કરવામાં આવી રહ્યો છે. જેસીબી ઓપરેટર જોગરાજ સિંહે જણાવ્યું કે તેને એક રેલીમાં 5,000 રૂપિયા મળે છે. અત્યાર સુધીમાં તેઓ લગભગ 5 વખત વિવિધ પક્ષોના ઉમેદવારો માટે જેસીબી લાવ્યા છે. આ વખતે વિધાનસભાની ચૂંટણીની સરખામણીમાં માંગ વધી છે.

ટ્રેક્ટરોની ભીડ જોવા મળી
બાયતુ ગામના લોકો જ ટ્રેક્ટર સાથે રેલીમાં પહોંચ્યા હતા. તેમાંથી મોટાભાગના લોકોએ પોતાને ભાજપના સમર્થક ગણાવ્યા હતા.આસપાસના લોકોએ કહ્યું કે ભીડ એકઠી કરવા માટે ટ્રેક્ટરમાં 1000 રૂપિયાનું ડીઝલ રિફિલ કરવામાં આવ્યું છે, તેથી લોકો ટ્રેક્ટર લઈને આવ્યા છે.

બાડમેર સીટ પર ત્રિકોણીય મુકાબલાને કારણે કોઈ પણ પક્ષ તાકાત પ્રદર્શનમાં પાછળ નથી. અપક્ષ ઉમેદવાર રવિન્દ્ર સિંહ ભાટીની રેલીમાં સેંકડો કારનો કાફલો જોવા મળી રહ્યો છે. ભાજપની રેલીમાં ઘણા યુવાનો કોંગ્રેસના ઉમેદવાર ઉમેદરામ ચૌધરી અને ભાટીનું સમર્થન કરતા જોવા મળ્યા હતા.