અમેરિકામાં ઘુસવા ‘ડંકી’ વેે બાદ હવે ક્રિકેટ વે!

હવે ક્રિકેટર બનાવી અમેરિકામાં ઘુસાડવાનો નવો ટ્રેન્ડ! ભાવ 40 થી 45 લાખ રૂપિયા

ઓન પેપર ક્રિકેટ રમવા અમેરિકા પહોંચેલા કેટલાક ગુજરાતીઓ બાદમાં છુંમતર થઈ ગયા છે!

અમદાવાદ,તા.12
ન્યૂયોર્કમાં હાલના દિવસોમાં ટી-20 વર્લ્ડકપ રમાઈ રહ્યો છે, અમેરિકામાં ક્રિકેટના ચાહકો પણ વધી રહ્યા છે જેનો ફાયદો ઉઠાવીને ક્રિકેટના નામે લોકોને ઈલીગલી અમેરિકા મોકલવાનો ધંધો પણ ચાલી રહ્યો છે.

ગુજરાતના ભેજાબાજ એજન્ટો અત્યારસુધી ઘણા લોકોને કલાકાર, પૂજારી, નકલી પતિ-પત્ની અને ક્રુ મેમ્બર બનાવીને અમેરિકા મોકલી ચૂક્યા છે પણ હવે લોકોને ક્રિકેટર બનાવીને પણ અમેરિકા મોકલાઈ રહ્યા છે, અને ઓન પેપર ક્રિકેટ રમવા માટે અમેરિકા પહોંચેલા આવા લોકો બેટ અને બોલ સાઈડમાં મૂકીને છૂમંતર થઈ જતા હોય છે.

જે વ્યક્તિને ક્રિકેટ બનાવીને અમેરિકા મોકલવાનો હોય છે તેનો અમેરિકાની કોઈ લોકલ ક્રિકેટ ક્લબ સાથે કોન્ટ્રાક્ટ કરવામાં આવે છે, તેમજ તેને ક્રિકેટનું થોડું-ઘણું નોલેજ પણ આપી દેવાય છે જેથી વિઝા ઈન્ટરવ્યુમાં કોઈ લોચા ના પડે. ક્રિકેટ રમવા અમેરિકા જનારો વ્યક્તિ ગુજરાતમાં નાની-મોટી ટુર્નામેન્ટ રમ્યો છે તેવું બતાવવા માટે પણ એજન્ટો બધી ગોઠવણ કરી દેતા હોય છે અને તેના દ્વારા અમેરિકાના ક્રિકેટ ક્લબ્સનો સ્પોન્સરશિપ લેટર મેળવીને છ મહિનાના સ્પોર્ટ્સ વિઝા લઈ લેવાય છે.

સૂત્રોનું માનીએ તો અમેરિકામાં સાઉથ તેમજ નોર્થ કેરોલાઈનામાં ક્રિકેટ ટુર્નામેન્ટ રમાતી હોય છે, પરંતુ આવી કોઈ ટુર્નામેન્ટમાં રમવાને બદલે સ્પોર્ટ્સ વિઝા પર અમેરિકા પહોંચેલા ગુજરાતીઓ ગાયબ થઈ જઈને અમેરિકામાં જ ઈલીગલી રહી જતા હોય છે.

આ પહેલા ઘણા ગુજરાતીઓ નાટક, ફિલ્મ કે ટીવીના કલાકાર બનીને અમેરિકાના વિઝા લેતા હતા, પરંતુ આ કાંડનો ભાંડો ફૂટી ગયા બાદ કલાકારોને અપાતા વિઝાના નિયમો કડક બન્યા હતા. જોકે, તેનો પણ એજન્ટોએ રસ્તો શોધી લઈને લોકોને ક્રિકેટર બનાવીને અમેરિકા મોકલવાનું શરૂ કર્યું હતું.

આ રેકેટ આજથી 4-5 વર્ષ પહેલા બહાર આવ્યું હતું જેમાં ગુજરાતથી લોકોને ક્રિકેટ રમવા રશિયા મોકલવામાં આવતા હતા. ત્યારબાદ દોઢેક વર્ષ પહેલા એજન્ટોએ અમેરિકામાં પણ ક્રિકેટની પોપ્યૂલારિટી વધતા સ્પોર્ટ્સ વિઝાનું રેકેટ શરૂ કર્યું હતું, જેમાં ઉત્તર ગુજરાતના કેટલાક એજન્ટો સામેલ છે અને તેઓ સ્પોર્ટ્સ વિઝા પર એક વ્યક્તિને અમેરિકા મોકલવાનો 40-45 લાખ રૂપિયા ચાર્જ કરે છે.

એક તરફ કેનેડા કે પછી મેક્સિકોવાળા રૂટથી ઈલીગલી અમેરિકા જવામાં ભરપૂર રિસ્ક છે તો બીજી તરફ સ્પોર્ટ્સ વિઝા દ્વારા કોઈપણ વ્યક્તિ સાવ સરળતાથી અમેરિકા પહોંચી શકે છે. એટલું જ નહીં, આ રેકેટનો ભાંડો ફૂટી ના જાય તે માટે સિલેક્ટેડ લોકોને જ સ્પોર્ટ્સ વિઝા પર અમેરિકા મોકલવામાં આવે છે.

સપ્ટેમ્બર 2023માં આવી જ રીતે માણસાનો મોન્ટી પટેલ અમેરિકા ગયો હતો જે વિઝા પૂરા થઈ ગયા હોવા છતાંય ઈન્ડિયા પાછો નથી આવ્યો, તેવી જ રીતે નવસારીનો આશીષ પટેલ પણ ગયા વર્ષે ક્રિકેટ રમવા ગયો હતો અને હાલ પણ તે ત્યાં જ છે.

આશીષ પટેલ અગાઉ સાત વર્ષ પહેલા ટીવી સિરીયલનો ક્રૂ મેમ્બર બની યુએસ ગયો હતો પરંતુ તેને પાછા આવવું પડ્યું હતું, ત્યારબાદ તેણે ત્રણ વર્ષ પહેલા ફરી ઈલીગલી યુએસ જવાનો ટ્રાય કર્યો હતો પરંતુ તેનો મેળ નહોતો પડ્યો.
આખરે 2023માં એક એજન્ટે તેને સ્પોર્ટ્સ વિઝા પર યુએસ મોકલવાની વાત કરી હતી અને તેને ન્યૂજર્સીની એક ક્રિકેટ લીગમાં સામેલ થવા માટે લેટર મળ્યો હતો.

અમદાવાદ ક્રાઈમ બ્રાંચના એક અધિકારીએ આ અંગે જણાવ્યું હતું કે આવા કેસમાં ગુનો વિદેશની ધરતી પર થતો હોવાથી કોઈ કાર્યવાહી નથી કરી શકાતી, જ્યારે રાજ્યના પોલીસ વડા વિકાસ સહાયે આ મામલે એવી પ્રતિક્રિયા આપી હતી કે આવો કોઈ કેસ હજુ સુધી સામે નથી આવ્યો, પરંતુ આ કરતૂત વિઝાના નિયમોનો ભંગ ચોક્કસ કહી શકાય.