ડાયરેક્ટરોની પેઢીઓને લોનની ખૈરાત, સેવિંગ ખાતામાં ગોટાળા અને ઇન-ઓપરેટીવ ખાતાઓમાં ગેરકાયદે દંડ

રાજકોટ નાગરિક બેંકને રૂા.43.30 લાખની પેનલ્ટી ફટકારતી RBI

રાજકોટ-સૌરાષ્ટ્રના સહકારી બેંક ઇતિહાસમાં અત્યાર સુધીની સૌથી મોટી પેનલ્ટી: ગત વર્ષે 13 લાખના દંડનો પોતાનો જ ‘રેકોર્ડ’ તોડ્યાની ચર્ચા: સહકારી ક્ષેત્ર-થાપણદારોમાં ખળભળાટ

રાજકોટ, તા.19
રાજકોટની જાણીતી સહકારી બેન્ક એવી રાજકોટ નાગરિક સહકારી બેન્કને રીઝર્વ બેન્ક ઓફ ઇન્ડિયાએ 43.30 લાખની ધરખમ પેનલ્ટી ફટકારતા સહકારી જગત તથા થાપણદારોમાં ખળભળાટ સર્જાયો છે. બેન્કના ડાયરેક્ટરોની હિત ધરાવતી પેઢીઓને લોનની ખેરાત કરવા ઉપરાંત સેવીંગ ખાતા ખોલવામાં ગોટાળા અને ઇન ઓપરેટીવ ખાતાઓમાં પેનલ્ટી લાગી કરવા એવા કારણોસર આ આકરુ કદમ ઉઠાવવામાં આવ્યું છે. 

રીઝર્વ બેન્ક ઓફ ઇન્ડિયાએ નાગરિક બેન્કને પાઠવેલા ‘પેનલ્ટી પત્ર’માં એમ કહ્યું છે કે 31 માર્ચ 2022ના રોજ કાનૂની ઇન્સ્પેક્શન હાથ ધરવામાં આવ્યું હતું અને તેમાં રીઝર્વ બેન્કના દિશા નિર્દેશોનું પાલન કરવામાં આવ્યું ન હોવાનું માલુમ પડ્યું હતું જેના આધારે બેન્કને તાકિદ કરીને શોકોઝ નોટીસ ઇસ્યુ કરવામાં આવી હતી. બેન્ક દ્વારા નોટીસનો જવાબ આપવામાં આવ્યા ઉપરાંત રૂબરૂ સુનાવણીમાં બચાવ રજુ કરવામાં આવ્યો હતો પરંતુ રીર્ઝવ બેંકના નિયમોનો ભંગ થતો જ હોવાનું સ્પષ્ટ થતાં પેનલ્ટી ફટકારવામાં આવી છે. 

નાગરિક બેન્ક દ્વારા રીર્ઝવ બેન્ક દ્વારા નિશ્ચિત દિશા-નિર્દેશો પૈકી 3 નિયમોનો ભંગ કરવામાં આવ્યું હોવાનું જાહેર થયું છે. તેમાં બેંકના ડાયરેક્ટરોની પેઢીને લોન આપવામાં આવી હતી બેન્ક ઉપરાંત આ ડાયરેક્ટર પેઢીમાં પણ ડાયરેક્ટર કે ટ્રસ્ટી હોવાનું સાબિત થયું હતું આ સિવાય કેટલાક લાયકાત વગરના લોકોના બચત ખાતા નહીં ખોલવાની સુચના હોવા છતાં બેંક દ્વારા આવા ખાતા ખોલવામાં આવ્યા હતા.

આ ઉપરાંત કેટલાક ઇન ઓપરેટીવ ખાતા હોવા છતાં બેન્ક દ્વારા મીનીમમ બેલેન્સ નહીં જાળવવાના નામે પેનલ્ટી ફટકારવામાં આવી હતી. બેન્કીંગ રેગ્યુલેશન એક્ટ 1949ની કલમ 47-એ (1)(સી)ની જોગવાઇ 46(4)(આઇ) અને 56 હેઠળ આ નાણાંકીય પેનલ્ટી ફટકારવામાં આવી હોવાનું જાહેર કરવામાં આવ્યું હતું.

રીઝર્વ બેન્કના આ પગલાથી સમગ્ર સહકારી જગતમાં ખળભળાટ સર્જાયો છે. થાપણદારોમાં પણ તીવ્ર પ્રત્યાઘાતો પડવાની આશંકા વ્યકત કરવામાં આવી રહી છે. સહકારી બેન્કોના સુત્રોએ જણાવ્યું હતું કે માત્ર રાજકોટ જ નહીં સૌરાષ્ટ્રભરની સહકારી બેન્કોના ઇતિહાસમાં આ સૌથી મોટામાં મોટી પેનલ્ટી હોવાની શક્યતા છે. આ પૂર્વે ગત વર્ષે પણ નાગરિક બેન્કને રીર્ઝવ બેન્કે 13 લાખની પેનલ્ટી ફટકારી હતી. નાગરિક બેન્કે સૌથી મોટી પેનલ્ટીનો પોતાનો જ રેકોર્ડ તોડ્યો હોવાની છાપ છે. 

રીઝર્વ  બેન્કે રાજકોટની નાગરિક બેંક ઉપરાંત દેશની અન્ય ચાર બેન્કોને પણ નોટીસો ફટકારી છે. દિલ્હીની કાંગરા કો-ઓપરેટીવ બેન્ક, લખનઉની રાજધાનીનગર સહકારી બેન્ક તથા ઉત્તરાખંડની જિલ્લા સહકારી બેન્કને પાંચ-પાંચ લાખની તથા દહેરાદુનની ડીસ્ટ્રીક્ટ કો-ઓપરેટીવ બેન્કને બે લાખની પેનલ્ટી ફટકારી છે. પાંચેય બેંકોને કુલ મળી 60.30 લાખનો દંડ ફટકારાયો છે.