અમેરિકાના સૌથી ઉંચા સ્કાયસ્ક્રેપરનું ઓકલાહામા શહેરમાં નિર્માણ થશે

World | 13 June, 2024 | 05:09 PM

વર્લ્ડ ટ્રેડ સેન્ટર કરતા પણ આ બિલ્ડીંગ ઉંચું બનશે

સાંજ સમાચાર

ઓકલાહોમ (અમેરિકા), તા.13
એક સમયે અમેરિકામાં આવેલી એમ્પાયર સ્ટેટ બિલ્ડિંગ વિશ્વની સૌથી ઊંચી બિલ્ડિંગ હતી. જોકે, ધીમે ધીમે અન્ય દેશોમાં તેનાથી ઊંચી ઈમારતો બનવા લાગી અને એમ્પાયર સ્ટેટ બિલ્ડિંગ તેનો તાજ ગુમાવ્યો હતો. હાલમાં દુબઈમાં આવેલી બુર્જ ખલીફા વિશ્ર્વની સૌથી ઊંચી ઈમારત છે.

જોકે, હવે અમેરિકાના ઓક્લાહોમા શહેરમાં અમેરિકાની સૌથી ઊંચી ઈમારત બનવા જઈ રહી છે અને તેને મંજૂરી પણ આપવામાં આવી છે. તેની ઊંચાઈ કેટલી હશે તે માટે યોજનાઓ ચાલી રહી છે પરંતુ તેની ઊંચાઈ 1907 ફૂટ હોઈ શકે છે. ન્યૂયોર્ક પોસ્ટના રિપોર્ટ પ્રમાણે ડેવલોપર મેટ્ટસન કેપિટલને ઊંચાઈના કોઈ પ્રતિબંધ વગર બિલ્ડિંગ બનાવવા માટે ગ્રીન સિગ્નલ મળી ગયું છે.

ગયા સપ્તાહે ઓક્લાહોમા સિટી કાઉન્સિલે વિવાદાસ્પદ લિજેન્ડ્સ ટાવર માટે નવી ઝોનિંગ એપ્લિકેશનને મંજૂરી આપી હતી જેને 1,750 ફૂટની ઊંચાઈએ બાંધવા માટે કહેવાયું હતું. તે ઊંચાઈએ તેને મેનહટનના વન વર્લ્ડ ટ્રેડ પછી દેશની બીજી સૌથી ઉંચી ઈમારત બનાવશે.ઓક્લાહોમા ડેવલપમેન્ટને એપ્રિલમાં પ્રારંભિક ઊંચાઈની મંજૂરીઓ મળી હતી અને હવે તે આર્કિટેક્ચરલ માર્વેલ નિર્માણ સાથે આગળ વધવા માટે તૈયાર છે.

તેમાં બે એપાર્ટમેન્ટ બિલ્ડીંગ, લો-ઈનકમ હાઉસિંગ, ગેરેજીસ અને હયાત ડ્રીમ હોટેલનો સમાવેશ થશે જેમાં 22 માળમાં 480 રૂમ અને 85 કોન્ડોસ પાર્કિંગ અને રિટેલ સ્પેસ હશે. અમેરિકાના સૌથી ઊંચા સ્કાયસ્ક્રેપર માટે એક માત્ર અવરોધ બાકી છે તે તેના સૂચિત લાસ વેગાસ જેવા ડિજિટલ સિગ્નેજનો મુદ્દો છે, જે તેના ચારેય ટાવર્સમાં ફેલાયેલા છે.

ઓક્લાહોમામાં બનનારી આ સૌથી ઊંચી બિલ્ડિંગ માટે ઊંચાઈના કોઈ પણ નિયંત્રણો રાખવામાં આવ્યા નથી. જોકે, 1907માં ઓક્લાહોમા અમેરિકાનું 46મું રાજ્ય બન્યું હતું તેના માનમાં લિજેન્ડ્સ ટાવરની ઊંચાઈ 1907 ફૂટ રાખવામાં આવી શકે છે. અમેરિકામાં હાલમાં સૌથી ઊંચી ઈમારત હાલમાં ન્યૂયોર્ક શહેરમાં વન વર્લ્ડ ટ્રેડ સેન્ટર છે. તે 2014માં ઓપન થયું હતું અને ઊંચાઈ 1776 ફૂટ છે.

જ્યારે વિશ્વની સૌથી ઊંચી ઈમારત દુબઈમાં આવેલી બુર્જ ખલીફા છે જેની ઊંચાઈ 2716.5 ફૂટ છે. ઓક્લાહોમા સિટીમાં લિજેન્ડસ ટાવર એકવાર બની જશે ત્યારે તે સત્તાવાર રીતે વિશ્ર્વની પાંચમી સૌથી ઊંચી ઈમારત બની જશે.