સૌરાષ્ટ્ર-ગુજરાતમાં ચોથા દિવસે પણ છૂટોછવાયો વરસાદ યથાવત

અમરેલી જિલ્લામાં પોણા બે, ગારીયાધારમાં 1 ઈંચ

માંડવી-દ્વારકામાં 0.5 ઈંચ: કવાંટ-ઉમરગામમાં એક-એક ઈંચ પાણી પડયુ

રાજકોટ,તા.18
ગઈકાલે સતત ચોથા દિવસે પણ સૌરાષ્ટ્ર-ગુજરાતમાં છુટો છવાયો વરસાદ યથાવત રહેવા પામ્યો હતો. ખાસ કરીને અમરેલી જિલ્લામાં પોણા બે ઈંચ જેટલો વરસાદ વરસી ગયો હતો તથા દ્વારકા જિલ્લામાં હળવા-ભારે ઝાપટા તો, આજે સવારે સોમનાથમાં ભારે ઝાપટા વરસી ગયા હતા.

આ ઉપરાંત ભાવનગરનાં ગાળીયાધારમાં 1 ઈંચ, છોટા ઉદેપુરનાં કવાંટ અને વલસાડનાં ઉંમરગામમાં પણ એક એક ઈંચ કચ્છમાં માંડવી અને દ્વારકામાં 0॥ ઈંચ વરસાદ વરસી ગયો હતો.

દરમ્યાન સૌરાષ્ટ્રમાંથી મળતા અહેવાલો મુજબ અમરેલી જિલ્લામાં ગઈકાલે પણ સતત વરસાદી માહોલ છવાયો હતો. અમરેલી,  બાબરા, લાઠી, લીલીયા, સાવરકુંડલા સહિતના વિસ્તારોમાં  હળવા  ઝાપટાથી લઈ પોણા બેઇંચ જેટલો વરસાદ નોંધાયો હતો.

અમરેલી શહેરમાં ગઈકાલે સતત ત્રીજા દિવસેબપોર બાદ ગાજવીજ સાથે વરસાદ શરૂ થયો હતો. પરંતુ ગાજયા મેઘ વરશે નહિ તેમ ઝાપટા સ્વરૂપે વરસી હાથ તાળી આપી ગયો હતો.

આ ઉપરાંત બાબરા પંથકમાં પણ ધોધમાર 40 મીમી વરસાદ નોંધાયો હતો. ભારે પવન અને વીજળીના કડાકા ભડાકા સાથે વરસાદ પડતાં બાબરા શહેરની શેરીઓમાં વરસાદી પાણી વહેતા થયા હતા. બાબરા ઉપરાંત તાલુકાના ચરખા, ચમારડી, વલારડી, દરેડ, ગળકોટડી, ખાખરિયા, ગમાપિપલિયા, ભીલા, ભીલડી સહિતનાં ગામડાંઓ ધોધમાર વાવણી લાયક વરસાદ વરસતાખેડૂતોમા ખુશીનો માહોલ જોવા મળ્યો હતો.

જયારે  ભીલા, ભીલડીમાં  બે કલાકમાં અઢીથી ત્રણેક ઇંચ જેટલો વરસાદ પડયાનું સ્થાનિક લોકો જણાવી રહયા છે. લીલીયા તથા તાલુકાના પુંજાપાદર ગામાં પણ  આજે  ફરી એક વખત વરસાદે હેત સાથે અર્ધો ઇંચ ધોધમાર વરસાદ પડી ગયો હતો. જેને લઈ લીલીયાની શેરીઓ બજારોમાં પાણી વહેતા થયા હતા. જયારે લીલીયા શહેરની મઘ્યમાંથી પસાર થતી નાવલી નદીમાં પાણી આવી જવા પામેલ હતું. લાઠી પંથકમાં પણ આજે ફરી એક વખત  ઘોઘમાર  અર્ધો  ઇંચ  વરસાદ  વરસી ગયો હતો.

લાઠી ઉપરાંત તાલુકાના હરસુરપુર દેવળીયા, શેખપીપરીયા સહિતના ગામમો ઘોઘમાર વરસાદ ખાબકયો  હતો. જયારે હરસુરપુર દેવળીયાની સ્થાનિક નદીમાં પુર આવતાં લોકો નદી કાંઠે ઉમટી પડ્યાહતા. હરસુરપુર દેવળીયા, શેખપીપરીયામાંથી પ્રસાર થતી ગાગડીયા નદીમા નવા નીર આવ્યા હતા. જેને લઈ હરસુરપુર દેવળીયામાં નદી નાળા-ચેકડેમ છલકાતા અને સારા  વરસાદને કારણે ખેડૂતોમા ખુશીનો માહોલ જોવા મળ્યો હતો. 

દેવભૂમિ દ્વારકા જિલ્લાના કેટલાક વિસ્તારોમાં રવિવારના વ્યાપક વરસાદ બાદ ગઈકાલે સવારથી વરસાદી વિરામ રહ્યો છે અને સર્વત્ર ઉઘાડ બની રહ્યો છે.
ખંભાળિયા શહેર તથા નજીકના વિસ્તારોમાં રવિવારે મુશળધાર 10 ઈંચ સુધીનો વરસાદ વરસી ગયો હતો. જો કે તાલુકાના મોટાભાગના ગામોમાં ક્યાંક ફક્ત ભારે ઝાપટા તેમજ કેટલા ગામોમાં માત્ર ત્રણ-ચાર ઇંચ વરસાદ હતો.

આ વચ્ચે ભાણવડમાં રવિવારે અઢી ઈંચ અને દ્વારકામાં પણ સોમવારે દોઢ વરસાદ બાદ ગઈકાલે સવારથી જ વરસાદી વિરામ રહ્યો છે. વાદળોની આવન-જાવન તેમજ ક્યાંક હળવા ઝાપટા વરસ્યા હતા. પરંતુ ઉઘાડ વચ્ચે વ્યાપક બફારા અને અસહ્ય ગરમીથી લોકો અકળાઈ ગયા છે.

આજે સવાર સુધીમાં દેવભૂમિ દ્વારકા જિલ્લાના મુખ્ય મથક ખંભાળિયા તાલુકામાં સૌથી વધુ 241 મિલીમીટર, ભાણવડ તાલુકામાં 60, દ્વારકામાં 37 અને કલ્યાણપુરમાં 5 મિલીમીટર કુલ વરસાદ નોંધાયો છે. વ્યાપક વરસાદથી અનેક ખેડૂતો પોતાના વાવણી કાર્યમાં વ્યસ્ત થયા છે.

સોમનાથ પ્રભાસપાટણ મા સવાર ના દશ કલાક ના અરસામાં જોરદાર ઝાપટું પડતાં રસ્તા ઉપર પાણી ફરી વળ્યા હતા અને આ કાળઝાળ ગરમી મા થોડી વાર માટે રાહત થયેલ પરંતુ વરસાદ બંધ થતાં ની સાથે ફરી તડકો નીકળ્યો હતો વરસાદ નુ પાણી મુખ્ય બજારમાં થય ને સોમનાથ તરફ જતા રસ્તા મા જ્યાં સોમનાથ ટ્રસ્ટે રસ્તો બંધ કરેલ છે ત્યાં પાણી ભરાતા નીચેના ભાગેથી પાણી નો નિકાલ કરવામાં આવેલ હતો.