યુએનમાં ભારતે ઈઝરાયલને આપ્યો ઝટકો, આપ્યું પેલેસ્ટાઈનને સમર્થન

ઈઝરાયેલ પેલેસ્ટાઈન વોર

યુએનમાં ભારતે ઈઝરાયલને આપ્યો ઝટકો, આપ્યું પેલેસ્ટાઈનને સમર્થન

World | 02 May, 2024 | 02:52 PM

સાંજ સમાચાર

ન્યુ દિલ્હી : ઈઝરાયેલ અને પેલેસ્ટાઈનને લઈને ભારતે મોટું નિવેદન આપ્યું છે, જેને ઈઝરાયેલ માટે ઝટકા તરીકે જોવામાં આવી રહ્યું છે. વાસ્તવમાં, ભારતે સંયુક્ત રાષ્ટ્રમાં ઇઝરાયેલ અને પેલેસ્ટાઇન માટેના બે-રાજ્ય ઉકેલને સમર્થન આપ્યું હતું.

યુએનની બેઠકમાં ભારતના સ્થાયી પ્રતિનિધિ રૂચિરા કંબોજે જણાવ્યું હતું કે, ભારત બે-રાજ્ય ઉકેલને સમર્થન આપવા માટે પ્રતિબદ્ધ છે, જ્યાં પેલેસ્ટાઈનના લોકો સુરક્ષિત સરહદોની અંદર સ્વતંત્ર દેશમાં રહી શકશે. તેમણે સંયુક્ત રાષ્ટ્રમાં પેલેસ્ટાઈનની અરજી પર પુનર્વિચાર કરવાની વાત કરી હતી.

ભારતના આ પગલાને ઈઝરાયેલ માટે ફટકા તરીકે જોવામાં આવી રહ્યું છે જ્યારે ઈઝરાયેલના વડાપ્રધાન પેલેસ્ટાઈન રાજ્યને ખતરા તરીકે જોઈ રહ્યા છે. તમને જણાવી દઈએ કે પેલેસ્ટાઈને તાજેતરમાં જ યુએનના સભ્યપદ માટે અરજી કરી હતી, જે અમેરિકાના વીટોના કારણે પાસ થઈ શકી ન હતી.

કંબોજે કહ્યું કે, અમને આશા છે કે યોગ્ય સમયે આ અંગે પુનર્વિચાર કરવામાં આવશે અને પેલેસ્ટાઈનના સંયુક્ત રાષ્ટ્રના સભ્ય બનવાના પ્રયાસને સમર્થન આપવામાં આવશે.

ભારતે પણ હમાસની નિંદા કરી હતી. 7 ઓક્ટોબર, 2023 ના રોજ, હમાસે ઇઝરાયેલ પર હુમલો કર્યો. તેમણે કહ્યું કે આતંકવાદને યોગ્ય ઠેરવી શકાય નહીં. ભારત હંમેશા આતંકવાદની વિરુદ્ધ રહ્યું છે. અમે તમામ બંધકોની બિનશરતી મુક્તિની પણ માંગ કરીએ છીએ. કંબોજે ગાઝામાં આંતરરાષ્ટ્રીય કાયદાઓ અને માનવતાવાદી કાયદાઓનું પાલન કરવાનું કહ્યું.

ભવિષ્યમાં પેલેસ્ટાઈનને મદદ કરવાનું ચાલુ રાખશે, વાતચીત દરમિયાન કંબોજે ગાઝાના લોકો માટે મદદ વધારવાનું પણ કહ્યું હતું. તેમણે કહ્યું કે, પરિસ્થિતિ સુધારવા માટે લોકોની મદદ કરવી જરૂરી છે.

ગાઝાના લોકોને માનવતાવાદી સહાયતા વધારવાની તાત્કાલિક જરૂર છે. તેમણે સૌને સાથે આવવા અનુરોધ કર્યો હતો. કહ્યું કે, અમે આ મામલે સંયુક્ત રાષ્ટ્ર અને આંતરરાષ્ટ્રીય સમુદાયના પ્રયાસોનું સ્વાગત કરીએ છીએ. ભારતે પેલેસ્ટાઈનના લોકોને માનવતાવાદી સહાય પૂરી પાડી છે અને તે કરતી રહેશે.