રાજકોટ, તા. 28
2023-24ના નાણાકીય વર્ષમાં રાજકોટ મહાપાલિકામાં 7641 જેટલા યુગલોએ લગ્ન નોંધણી કરાવી છે. તે અંતર્ગત મહાપાલિકાના જન્મ-મરણ વિભાગને નોંધણી ફીની પાંચ લાખની આવક પણ થઇ છે.
છેલ્લા વર્ષોમાં લગ્ન નોંધણી માટેનો કાયદો હવે ફરજિયાત બન્યો છે. લગ્ન બાદ જુદા જુદા સરકારી કામોમાં મેરેજ રજીસ્ટે્રશન સર્ટીફીકેટ અનિવાર્ય બન્યું છે. ભવિષ્ય માટે તે સલામતીરૂપ પણ છે. આમ તો મનપાની આરોગ્ય શાખામાં લગ્ન નોંધણી વિભાગમાં ગીર્દી કયારેય ઘટતી નથી. આધાર કેન્દ્રની જેમ જન્મ-મરણ વિભાગના વિસ્તૃતિકરણ અને સેટઅપમાં વધારો કરી લોકોનો સમય બચાવવાની જરૂર છે.
પરંતુ આધાર કેન્દ્ર અને લગ્ન નોંધણી વિભાગમાં ગીર્દીનો સતત વિકાસ થઇ રહ્યો છે. જે રીતે સિવિક સેન્ટરમાં હેલ્પડેસ્ક ચાલુ કરવામાં આવ્યા છે તે રીતે આ બંને વિભાગમાં પણ કાયમી વ્યવસ્થાની જરૂર છે. પરંતુ આવી નાની નાની વાતમાં મોટા અધિકારીઓ અને પદાધિકારીઓ રસ લેતા ન હોય તે કારણે જ યુગલોએ વકીલો તથા એજન્ટોના સહારે જવું પડે છે.
પુરા થઇ રહેલા નાણાકીય વર્ષની વાત કરીએ તો એપ્રિલ-2023થી માર્ચ ર0ર4 સુધીમાં રાજકોટ મનપાની આરોગ્ય શાખામાં કુલ 7641 લગ્ન નોંધણી થઇ છે. આ પેટે કોર્પો.ને નોંધણી ફીની રૂા. પાંચ લાખની આવક થઇ છે. લગ્ન રજીસ્ટ્રેશન માટે અનેક વખત અરજદારોને બેસવાની જગ્યા પણ હોતી નથી. આ ફોર્મ ભરવા, જન્મ-મરણના દાખલામાં સુધારા કરવા જેવી રોજિંદી કામગીરી માટે આવતા અરજદારોનું કામ સિવિક સેન્ટરની જેમ ગ્રાઉન્ડ ફલોર પર જ થઇ શકે તેના બદલે વર્ષોથી ત્રીજા માળે ચાલી રહ્યું છે. નાગરિકોને સિવિક સેન્ટરમાંથી જ કામ પુરા થઇ જવા જોઇએ તે વાત લગ્ન નોંધણી વિભાગમાં ભુલી જવામાં આવે છે.
લગ્ન નોંધણી પ્રમાણપત્ર એક કાનુની દસ્તાવેજ જેવું સર્ટીફીકેટ છે. તેમાં ચોકસાઇ અનિવાર્ય છે. પરંતુ અમુક વખત નવયુગલોને પુરાવાના પણ પુરાવા માંગીને હેરાન કરવામાં આવતા હોવાની ફરિયાદ કોર્પોરેટરો સુધી પહોંચે છે. કમ સે કમ લોકોને ત્રણ માળ ચડવાની કસરતમાંથી મુકિત અપાવવાની જરૂર છે. આ કામ અને સરળ વ્યવસ્થા આચારસંહિતામાં પણ થઇ શકે તેમ છે. વર્ષો પહેલા તો લગ્ન નોંધણી ફોર્મની કાર્યવાહી વોર્ડવાઇઝ કરી દેવાની મોટી મોટી વાતો થઇ હતી. જે સ્માર્ટ વાતો પણ હવામાં જ રહી ગઇ છે!
કયા માસમાં કેટલા
રજીસ્ટ્રેશન થયા
માસ નોંધણી
એપ્રિલ 811
મે 782
જુન 743
જુલાઇ 695
ઓગષ્ટ 640
સપ્ટેમ્બર 392
ઓકટોબર 412
નવેમ્બર 326
ડિસેમ્બર 662
જાન્યુઆરી 686
ફેબ્રુઆરી 740
માર્ચ 752
Rajkot - Head Office,
Sanj Samachar Corporate House,
2nd Floor, Kasturba Road,
Near Sharda Baug
Rajkot-360001
0281-2473911-12-13
Privacy-policy